Netflix собиқ раҳбари Свати Шетти томонидан асос солинган Bridge7 кино компанияси “Харобадан чиққан миллионер” фильмининг давоми ва фильмга мослаштирилган сериални суратга олиш ҳуқуқини қўлга киритди.
Драманинг кейинги қисмини суратга олиш учун Bridge7 компанияси оригинал фильм асосчиси Cеlador билан шартнома тузди. Лойиҳа тафсилотлари, сюжет ва актёрлар таркиби ҳақидаги маълумотлар ошкор этилмаган.
Викас Сварупнинг “Савол-жавоб” романи асосида режиссёр Дэнни Бойл томонидан суратга олинган фильм дунё миқёсида шуҳрат қозонди ва саккиз карра “Оскар” мукофотини, жумладан, “Энг яхши фильм” ва “Энг яхши режиссёр” номинацияларида ғолибликни қўлга киритди. Фильм 18 ёшли Жамол ҳақида бўлиб, унинг ҳаётида бўлиб ўтган қийинчиликлар йигитга машҳур викторина шоусида ғалаба қозонишга ёрдам беради.
Bridge7 компанияси раҳбари “Харобадан чиққан миллионер” ноёб маданий феноменга айланганини қайт этди:
“Бу турли давлат ва маданиятга тегишли барча томошабинларни умуминсоний ҳикоялари орқали бирлаштиради. Биз кино оламининг ажойиб намунасини давом эттириш имкониятига эга бўлганимиздан мамнунмиз”.
Ҳозирча бош ролларга Дев Пател, Фрида Пинто бошқа актёрлар фильмга қайтиши номаълум. Сиквелда бош қаҳрамон Жамол ҳаётидаги кейинги воқеалар қандай ривожлангани ҳақида сўз боради.
Мазкур лойиҳа 2023 йилда ташкил этилган Bridge7 компаниясининг биринчи йирик иши. Cеладор раҳбари Пол Смитнинг сўзларига кўра, янги компаниянинг илк лойиҳага айнан шу фильмни танлаши “Харобадан чиққан миллионер” нинг кинематограф учун нақадар аҳамиятли эканлигини исботлайди.
Изоҳ (0)