Ёз фасли кечаларини оила даврасида барча учун бирдек манзур бўладиган қизиқарли фильмлар билан ўтказишни тавсия этамиз.
“Космосдан келган овоз” (Wow! Nachricht aus dem All)
Германия, 2023 йил
Аннабель ва Дино исмли дўстлар астрономиясиз ҳаётини тасаввур эта олмайди. Ёш тадқиқотчилар ўз тажрибалари давомида коинотдан сирли хабар: олади болалар ўзга сайёраликлар Ер билан алоқа ўрнатишга уринаётганига амин бўлади. Аммо дунёда мўжизалар борлигига ишончи йўқолган катталар бунга ишонмайди.
Аннабель ва Дино космодромга экскурсия қилади ҳамда у ерда сайёрамизга бошқа оламдан келиб қолган ва ҳавода муаллақ турувчи тошни топиб олади. Дўстлар бутун галактикада ердан ташқари бошқа сайёраларда ҳам ҳаёт мавжудлигини исботлаш учун тошни ўғирлашга қарор қилади. Бироқ уларнинг режаси амалга ошмайди ва космодромни тарк этишга уринаётган вақтда тасодифан космик кемага тушиб қолган болалар орбитага учиб кетади. Бундан қўрқиб кетмаган жасур болалар имкониятдан фойдаланишга қарор қилади ва ўзга сайёраликларни излаш вақтида ажойиб саргузаштларни бошдан ўтказади.
“Гапга кирмаслар” (Непослушники)
Россия, 2024 йил
Томошабинлар томонидан севиб кўрилган фильмнинг давоми (сиквел) бўлиб, унда бош қаҳрамон Дима энди “Димонстр” эмас, автосалонда савдо менежери лавозимида ишлайди, Саша Чёрный эса роҳиб.
Ибодатхонада ҳамма болалар уйидан тўрт нафар шўх ва итоат этмайдиган болалар олиб келингунга қадар тинчгина яшарди. Болалар уйидан қайта ва қайта қочиш, майда ўғриликлар сабабли болаларни етимхонадан кўра қаттиққўлроқ жойга юборишга тўғри келади. Терговчи уларнинг ҳаётини барбод этишни истамайди ва тўртта бола — икки қиз ва икки ўғилни Анатолий ота қарамоғига топширади. Аммо бу қарор қанчалик тўғри эканлиги фильм давомида ёритилади.
“Грэйси ва Педро: тўрт оёқлилар саёҳати” (Gracie and Pedro: Pets to the Rescue)
Канада, 2024 йил
Педро ва Грэйси бир оиланинг севимли уй ҳайвонларидир. Шўх жонзотлар мунтазам жанжал қилиб юради ва турли характерга эга бўлгани учун доимий муаммоларга дуч келади. Педро — панжаларини кир қилишдан ва хавф-хатардан қўрқмайдиган мушук. Грэйси — ўзини ҳақиқий аристократ ва камёб наслдан деб ҳисоблайдиган мағрур ит. Уларнинг эгаси янги шаҳарга кўчиб ўтиш вақтида уй ҳайвонлари сақланган қафас қулфи очилиб, мушук ҳамда ит ташқарига чиқиб кетади. Уйга қайтиш ва оиласини излаб топиш учун қаҳрамонлар хавф-хатарларга тўла мураккаб йўлни босиб ўтишлари лозим бўлади. Бу орада Педро ва Грэйси янги дўстлар орттиради ва хиёнаткор душманларга қарши учрашади. Шу тариқда улар бир жамоа бўлиб яшашни ўрганади.
“Барча болалар кучуги бўлишини орзу қилади” (Каждый мечтает о собаке)
Россия, 2024 йил
Юрка исмли ўн икки ёшли мактаб ўқувчиси янги дўстлар орттиришни орзу қилади. Унинг синфига иккита янги ўқувчи келганидан сўнг Юрканинг ҳаёти буткул ўзгариб кетди. Янги синфдош ака ва сингиллар таниқли учувчининг фарзандлари бўлиб чиқади. Улар ёрдамида Юрка ҳақиқий дўстликни топади ва умрида илк бор қиз болани ёқтириб қолади.
Мазкур фильмдаги воқеалар ўтган асрнинг 60 йилларида Москва шаҳрида бўлиб ўтади. Унда дўстлик, меҳр-шафқат, ғамхўрлик каби эзгу хислатлар кўрсатилади. Бош қаҳрамон ҳаётида биринчи марта хиёнат ва шафқатсизликка дуч келади, лекин айни пайтда у ҳамдардлик ва кечиримли бўлишни ўрганади.
Изоҳ (0)