Продюсер Жон Ландау «Аватар» фильмининг Янги Зеландиядаги апрель ойида суратга олиниши режалаштирилган саҳналари коронавирус пандемияси туфайли тўхтатилганини маълум қилди, деб хабар берди «КиноПоиск».
Унинг сўзларига кўра, ушбу қарор биринчи навбатда коронавирус тарқалишининг олдини олиш, шунингдек, суратга олиш гуруҳи ва актёрлар саломатлигини таъминлаш мақсадида қабул қилинган. Ҳозирча суратга олиш ишлари қачон қайта бошланиши номаълум.
«Биз коронавирус билан боғлиқ вазият яхшиланиши билан суратга олиш жараёнини бошлаймиз. Суратга олиш гуруҳининг саломатлиги биз учун биринчи ўринда», — дейди фильм продюсери.
«Аватар»нинг барча — тўртта сиквелларининг суратга олиш жараёни бир вақтда амалга оширилмоқда. Суратга олиш жараёнининг қолдирилиши илк сиквел — «Аватар 2»нинг тақдимоти санасига таъсир кўрсатмайди: Фильм Америкада 2021 йилнинг 17 декабрида томошабинларга тақдим этилади.
«Аватар 2»нинг сюжети ҳақида умумий маълумотларгина ошкор қилинган. Ундаги воқеалар илк фильмдаги воқеалардан бир неча йил ўтиб, давом этади. Бош қаҳрамонлар Жейк ва Нейтири қиз фарзандли бўлади.
Тахмин қилинишича, фильмда Пандора аҳолиси қимматли ресурсга эга чиқишга уринган инсоният билан беллашади.
Аввалроқ АҚШнинг барча штатларида коронавирус аниқланган эди, шунингдек, бу инфекция кириб бормаган Европа мамлакати қолмади.
Дунё бўйича коронавирусга чалинганлар сони 198 мингдан ошди. Хубэйда бир суткада бир бемор аниқланди, Испанияда эса 182 киши вафот этди.
Ўзбекистонда ҳозирга қадар коронавирусни юқтириш билан боғлиқ 15 та ҳолат қайд этилди.
Изоҳ (0)