«Қасоскорлар: Финал» 2019 йилнинг энг кўп фойда келтирган фильми бўлди

Deadline нашри 2019 йилда катта экранларга чиқарилган энг кассабоп фильмлар рўйхатини тузди.

Ҳисоб-китоблар жараёнида фильмнинг кассадан олган соф фойдаси инобатга олинди. Ҳосил бўлган суммадан журналистлар ишлаб чиқариш бюджети, реклама ва бошқа харажатларни чиқариб ташлаган.

25 та фильмни ўз ичига олган рўйхатнинг биринчи ўрнини 2019 йилда ижодкорларга 890 миллион доллар соф фойда келтирган «Қасоскорлар: Финал» фильми эгаллади.

Қўрқинчли фильмлар энг сердаромад жанрлардан бўлиб қолмоқда. Бунинг сабаби уларнинг кам бюджет асосида суратга олиниши.

Жордан Пилнинг «Биз» фильми ўтган йили энг кўп даромад келтирган қўрқинчли фильм бўлди. Фильм ижодкорлари 119 миллион доллар соф фойда кўрган.

«Юлдузлар жанги»нинг тўққизинчи эпизоди янги трилогиянинг энг қиммат бюджетга эга қисми бўлди. Унинг бюджети 275 миллион долларни ташкил этди. Бунга қарамай Жей Жей Абрамснинг картинаси Disney’га бор йўғи 300 миллион доллар фойда келтирди.

«Ўргимчак одам: уйдан узоқда» 2019 йилда Sony киностудиясига энг кўп даромад келтирган фильм бўлди. Сиквел ижодкорларга 339 миллион доллар фойда келтирди.

Тўртинчи ўринни «Joker» 437 миллион даромад билан забт этди. Ушбу сумманинг ярми Warner Bros’нинг ҳамкорларига тегишли. Шунингдек, режиссёр Тодд Филлипс ҳам 70 миллион доллар олади.

Энг сердаромад фильмлар рейтингининг кучли бешталигига «Капитан Марвел», «Қирол шер», «Музюрак 2» ҳамда «Қасоскорлар: Финал» фильмлари кирди.