Мактабгача ва мактаб таълими вазири Ҳилола Умарова Тошкентда мактаб директорларига босим ўтказиб, таълим даргоҳидаги ошхоналарни аукционда сотаётган амалдорларга қарши курашилиши, ҳудуддаги мактаб ошхоналарининг сотуви тўхтатилишини маълум қилганди.
“Дарё”га келиб тушган маълумотларга кўра, Тошкент шаҳрининг Сергели, Янгиҳаёт ва Бектемир туманларида вазир топшириғига зид ҳаракатлар амалга оширилмоқда.
Бу ҳақда “Дарё”га маълумот берган масъуллардан бирига кўра, 20 сентябрь куни Янгиҳаёт туман мактабгача ва мактаб таълими бўлими мудири Дилфуза Мустафаева тумандаги мактаб директорлари учун йиғилиш ўтказиб, барча директорларга мактаб ошхоналарини аукцион савдога чиқариш топшириғини берган.
20 сентябрь куни соат 16:30 да бўлимда мактаб директорлари учун йиғилиш бўлиши эълон қилинган. Мазкур йиғилишда бўлим мудири томонидан барча директорларга топшириқ берилиб, 21 сентябрь куни соат 13:30 гача мактаб ошхоналарини аукцион савдога чиқариш тўғрисида хатлар тайёрланиши кераклиги уқтирилган, дейди манба.
Манбанинг билдиришича, Янгиҳаёт туманидаги 2-сонли умумтаълим мактаби ошхонаси кеча, 20 сентябрь куни аукционда сотилган.
Янгиҳаётдаги мактаб ошхонаси кеча, 20 сентябрь куни 169 миллион 500 минг сўмга сотилди. Вазир Ҳилола Умарова август ойида журналистлар билан учрашганда мактаб ошхоналари сотилмаслигини, ҳаракатлар тўхтатилишини айтганди. Шунга қарамасдан Янгиҳаёт туманида вазир топшириғига зид ишлар қилинмоқда, дейди манба.
Манбанинг қўшимча қилишича, айни кунда Сергели туманидаги 267- ва 269-мактаб ошхоналари, Бектемир туманидаги 290- ва 291-сонли мактаб ошхоналари аукцион савдога қўйилган. Муддати келгач, улар ҳам сотилади.
“Дарё” журналисти билан телефон орқали мулоқотда бўлган Янгиҳаёт туман мактабгача ва мактаб таълими бўлими мудири Дилфуза Мустафаева нафақат мактаб директорларига ошхоналарини сотувга қўйиш бўйича топшириқ берганини, кеча, 20 сентябрь куни йиғилиш қилганини ҳам инкор этди. Бироқ журналист билан суҳбатда бўлган шу тумандаги 3- ва 304-мактаб директорлари 20 сентябрь кунлари “РайОНО”га йиғилишга чақирилганини тасдиқлади.
Йиғилишга чақирилган эдик, лекин мен боролмадим. Шу сабаб йиғилишда нималар ҳақида гапирилганини, қандай топшириқ берилганини билмайман, дейди 3-мактаб директори.
304-мактаб директори эса журналист билан суҳбат давомида Telegram’ига қараб, 20 сентябрь куни йиғилишга чақиришганини, буни 21 сентябрь куни билаётганини айтди.
Мен йиғилиш ҳақида ҳозир, сиз айтганингиздан кейин биляпман. Ҳақиқатан ҳам кеча, соат 16:30 да йиғилишга чақирилган эканмиз. Аммо мен бормаган эканман. Энг қизиғи кимдир нега йиғилишга келмадингиз ҳам деб сўрамабди-да, дейди тумандаги 304-мактаб директори.
Суҳбатдош директорлар — 3- ва 304-мактаб директорлари улар раҳбарлик қилаётган муассаса ошхонасини аукционда сотиш бўйича шу кеча-кундузда ҳеч кимдан топшириқ бўлмаганини айтмоқда. Шунингдек, улар ижара марказига мактаб ошхоналарини аукционда сотиш бўйича хат ҳам берилмаганини маълум қилди.
Вазир топшириғидан сўнг бошқарма орқали мактаб ошхоналари сотилмаслиги кераклиги айтилган. Биз юқори ташкилотимиз қандай топшириқ берса, шуни бажарамиз, дейди мактаб директорларидан бири.
“Дарё” журналисти Янгиҳаёт туман мактабгача ва мактаб таълими бўлими мудири Дилфуза Мустафаева билан мулоқот қилар экан, вазир топшириғига зид равишда у раҳбарлик қилаётган тумандаги 2-сонли мактаб ошхонаси сотувга қўйилгани сабабини сўради. Бўлим мудири туманда эндигина иш бошлаганини, ушбу мактаб ошхонаси аукционда сотилганидан хабари йўқлигини айтди. Бу ҳақда суриштириб, маълумот олгач, хабар беришини қўшимча қилди.
Вазир Ҳилола Умарованинг матбуот котиби, Мактабгача ва мактаб таълими вазирлиги ахборот хизмати раҳбари Дилфуза Собирова Янгиҳаёт, Сергели ва Бектемир туманларидаги мактаб ошхоналарининг аукционда сотувга қўйилганидан бехабар эканини, бу бўйича суриштириб, вазир топшириғига қарши қилинган иш ўрганилаётганини маълум қилди.
Изоҳ (0)