Мактабгача ва мактаб таълими вазири Ҳилола Умарова 2024 йилнинг 28 август куни Тошкент шаҳридаги 298-мактабда ОАВ вакиллари билан учрашувда мактаб ошхоналарини аукционда сотиш тартиби бекор қилинганини, вазирлик буни назоратга олганини маълум қилганди. Шунга қарамасдан, Сергели, Янгиҳаёт ва Бектемирда вазир топшириғига зид ишлар олиб борилаётгани маълум бўлгач, вазирликнинг Тошкент шаҳар бошқармаси мазкур мақолага муносабат билдирди ва мактаб ошхоналарини аукцион орқали ижарага бериш тўхтатилганини такрорлади. Олмазор туман мактабгача ва мактаб таълими бўлими мудири Рустам Айдинов вазирлик ва бошқарма бошлиғи талабига зид ҳаракат қилмоқда.
Бу ҳақда “Дарё”га маълумот берган манбага кўра, бўлимнинг ходимлар билан ишлашга масъули мудир Рустам Айдинов топшириғи билан тумандаги барча мактаб директорларига мактаб ошхоналарини аукцион савдога чиқаришни сўраб хат ёзишга мажбурламоқда.
29-, 146-, 219-, 224-, 278-мактаблардан ташқари барча мактаб директорлари диққатига! Эртага (15 октябрь санаси назарда тутилмоқда) соат 13:00 га қадар намунада кўрсатилган маълумот ва объект паспортни мактабингизга тўғрилаб (фирменний бланкага ёзиб) имзо ҳамда муҳр қўйиб, ММТБ кадрлар хонасига шахсан ўзингиз олиб келиб топширишингиз сўралади. Менежерлик ўқишида ўқиётган директорлар, ўқишдан чиққанингиздан сўнг қуйидаги маълумотнома ва объект (мактаб) паспортини имзо, муҳр қўйиб ўзингиз олиб келиб соат 17:00 га қадар топширишингиз сўралади, дейди директорларга Telegram гуруҳи орқали топшириқ берган масъул Раънохон Аҳмедова.
Раъно Аҳмедова бўлимда ходимлар йўриқчиси сифатида ишлаб келишини тасдиқлаб, директорларга Telegram орқали берган топшириғини тан олди. Бироқ бу топшириқ мазмун-моҳиятини унча тушунмаслигини, мудир айтгани учун бажараётганини билдирди.
Бу нима топшириқ эканини билмайман. Менга мудир шундай топшириқ бергани учун директорлардан хат сўраяпман. Вазир буни тақиқлаганми, мен ҳозир мудирдан сўрайман, дейди “Дарё” журналистининг саволларига жавоб қайтарган масъул.
Олмазор туман мактабгача ва мактаб таълими бўлими мудири Рустам Айдинов журналистнинг бу ҳақдаги саволларига жавоб берар экан, “бундан хабарим йўқ экан, ҳозир суриштириб, аниқ маълумот бераман”, деди. Бироқ шундан сўнг мудир ҳам, Раънохон Аҳмедова ҳам телефон қўнғироқларига жавоб қайтармади.
Вазирликнинг Тошкент шаҳар бошқармаси ахборот хизмати вазиятни изоҳлар экан, мактаб ошхоналарини аукцион орқали ижарага бериш тартиби бекор қилинганини, вазирлик ва бошқарма бундай ҳаракатга қарши эканини эслатди. Шунингдек, Олмазордаги ҳолат назоратга олинганини қўшимча қилди.
“Дарё” воқеалар ривожини кузатишда давом этади.
Изоҳ (0)