Россия нефтининг Қозоғистон орқали Ўзбекистонга кириб келиши 2024 йилнинг январь—август ойларида 2023 йилга нисбатан 30 фоизга ошди. Бу ҳақда Россия энергетика вазирининг биринчи ўринбосари Павел Сорокин маълум қилган.
Сорокин Федерация Кенгаши ва Қозоғистон Сенати ўртасидаги ҳамкорлик бўйича комиссиянинг 22-йиғилишида сўзга чиқиб, жорий йилда Ўзбекистонга нефть етказиб бериш ҳажми сезиларли даражада ошганини таъкидлаган ва қозоғистонлик ҳамкорларга асосли ёндашув учун миннатдорлик билдирган.
Бундан ташқари, у 2023 йилда Россия нефтининг Қозоғистон орқали Хитойга етказилиши 10 миллион тоннани ташкил этганини эслатиб, 2024 йилда ҳам бу кўрсаткич қайд этилишини ишонч билан айтиб ўтган.
2023 йилда Россиядан Ўзбекистонга етказиб берилаётган нефть ҳажми 154,3 минг тоннани ташкил этган бўлса, 2024 йил охирига келиб бу ҳажмни 500 минг тоннадан ортиқроққа етказиш режалаштирилган.
Изоҳ (0)