Мозори Шариф аҳолиси оиласи ва дўстлари билан совуқ кунларда шаҳардаги балиқ пиширадиган ресторанларга боради. Хол Муҳаммад шундай мижозларга хизмат кўрсатувчилардан бири бўлиб, 20 йилдан ортиқ балиқ пиширган. У “Дарё” мухбири билан суҳбатда об-ҳавонинг совуқлашиши ва қишнинг бошланиши билан иш фаоллашгани, кўпчилик балиқ харид қилишга келишини айтди.
Хол Муҳаммаднинг сўзларига кўра, кимнинг шароити ва иқтисоди яхши бўлса, Ўзбекистон чегараси яқинидаги Ҳайратон шаҳрига балиқ сотиб олиш учун боради. Чунки Амударё балиқлари мазали ва нархи чет эл балиқлариникидан уч баравар қиммат.
Бизда барча турдаги балиқлар бор, қиш мавсумида турли вилоятлардан одамлар ташриф буюради, оилалар келади, бизда маҳаллий балиқлар жуда кўп, уларнинг сифати ва таъми Покистонникидан анча юқори, дейди балиқ пиширувчи ошпаз Юсуф.
У “Дарё” мухбири билан суҳбатида балиқ бозори аввалгидек эмаслиги, аммо барибир шу билан кун кечиришини таъкидлади. Юсуф мижозлар сони асосан қишда кўпайишини билдирди.
Афғонистонда маҳаллий балиқ етишмаслиги сабабли асосан бозорларда Покистонники сотилади, дейди мозори шарифлик яна бир балиқ сотувчи Носир.
У қишда дарёларда сувнинг камайиши маҳаллий балиқлар савдосига ҳам таъсир қилиши, савдогарлар Афғонистонга ташқи бозорлардан, хусусан, Покистондан балиқ олиб келишга мажбур бўлаётганини айтди. Носирнинг таъкидлашича, Покистон балиқларининг бир килограмми 200 дан 350 афғонигача (18 ноябрдаги курс бўйича 37 600 сўмдан 66 минг сўмгача), маҳаллий балиқлар эса 600 дан 1000 афғонигача (113 мингдан 188 минг сўмгача) сотилади. Одамлар нархи туфайли маҳаллий балиқдан кўра Покистонникини афзал билади.
Изоҳ (0)