Ижтимоий ҳимоя миллий агентлиги Тошкентда ногиронлиги бўлган шахслар учун “Ижтимоий такси” пилот лойиҳаси ишга тушганини эълон қилди.
Ушбу лойиҳа аҳолининг ижтимоий ҳимояга муҳтож қатламларини қўллаб-қувватлаш, жумладан, ногиронлиги бўлган шахслар ва таянч ҳаракатида муаммолари бўлган болалар учун ижтимоий соҳа объектлари, таълим муассасаларига бориб келишига қулайликлар яратиш мақсадида йўлга қўйилди.
Ижтимоий такси хизматига қандай буюртма берилади?
Хизматдан фойдаланиш Yandex Go иловаси орқали амалга оширилади. Мазкур иловада ногиронлиги бўлган шахсларнинг эҳтиёжларига мослаштирилган махсус функция Yandex Go иловасида алоҳида экранда мавжуд. Уларни ҳар қандай тарифда манзилга етиб олиш учун танлаш мумкин (Старт, Комфорт ёки Комфорт+). Барча тарифларда хизмат нархлари ўзгармайди.
Буюртмани қабул қилган ҳайдовчига мижозни манзилга олиб бориш давомида қуйидаги махсус вазифаларни амалга ошириш кераклиги ҳақида хабар берилади, масалан:
- машина топишга ёрдам беринг манзил карточкасида фойдаланувчига машинани топиш, унинг ёнига келиш ва салонга ўтиришга ёрдам берувчи изоҳ кўринади;
- эшитишида муаммолари бўлган шахсларга ҳайдовчи чат орқали мулоқот қилишни сўраши керак бўлади;
- “ногиронлик аравачасидаман” бу функция танланган бўлса, ҳайдовчида “ногиронлар аравачасида бўламан, машинага ўтиришда ёрдам, бўш юкхона керак” изоҳи кўринади.
“Набирамнинг ҳаракатланишида муаммоси бор, ҳар куни такси хизматидан фойдаланамиз. Эндиликда набирамни ижтимоий таксида бемалол ихтисослаштирилган мактабгача таълим ташкилотининг “Ғамхўрлик” гуруҳига олиб бормоқдаман. Нархлари ҳам арзон. Хизматдан жуда ҳам мамнунман. Ушбу хизмат ногиронлиги бўлган шахслар учун қулай ва мослаштирилган”, дейди хизматдан фойдаланаётган аёл.
Агентлик “Ижтимоий такси” пилот лойиҳаси амалга оширилиши ҳақида 2024 йилнинг март ойида маълум қилганди. Ушбу пилот лойиҳани Тошкентдан ташқари Сирдарё вилоятида ҳам йўлга қўйиш кўзда тутилганди.
Изоҳ (0)