Қашқадарёда парваришга муҳтож, ёлғиз кекса ва ногиронлиги бўлган шахслар чуқурлаштирилган тиббий кўрикдан ўтказилади

Қашқадарё вилоятида ўзгалар парваришига муҳтож бўлган ёлғиз яшовчи кексалар ва ногиронлиги бўлган шахслар чуқурлаштирилган тиббий кўрикдан ўтказилади. Мазкур тиббий кўриклар “Инсон” ижтимоий хизматлар марказлари томонидан тасдиқланган жадвал асосида амалга оширилади. Бу ҳақда “Дарё”га Ижтимоий ҳимоя миллий агентлиги Қашқадарё вилояти бошқармаси ахборот хизмати раҳбари Дилшод Шодиев хабар берди. 

Қайд этилишича, чуқурлаштирилган тиббий кўриклар эндиликда бир йилда камида бир маротаба ўтказилиши режалаштирилган.

“Инсон” ижтимоий хизматлар марказлари ходимларга фуқаролардан кам таъминланган оилалар болалари учун нафақа ва моддий ёрдам тайинлаш бўйича аризаларни қабул қилиш ваколати ҳам берилади. Шу ва шунга ўхшаш ижтимоий хизмат масалалари юзасидан фуқаролар яшаш манзилидаги маҳалла фуқаролар йиғинига ёки туман (шаҳар) “Инсон” ижтимоий хизматлар марказларига мурожаат қилиши мумкин бўлади, — дейди Дилшод Шодиев.

Бошқарма ахборот хизмати шунингдек, фуқаролар учун вилоятдаги барча туман(шаҳар)ларнинг “Инсон” ижтимоий хизматлар марказлари манзилларини маълум қилган.