Олий Мажлис Сенати раиси Танзила Норбоева ҳамда Ижтимоий ҳимоя миллий агентлиги директорининг биринчи ўринбосари Шаҳноза Мирзиёева 13 сентябрь куни АҚШ президентининг ногиронларнинг халқаро ҳуқуқлари бўйича махсус маслаҳатчиси Сара Минакара билан учрашув ўтказди. Бу ҳақда агентлик матбуот хизмати хабар берди.
Учрашувда ногиронлиги бўлган шахслар учун ижтимоий шарт-шароитларни яхшилаш ва бу борадаги ишларни халқаро стандартлар асосида ташкил этиш бўйича ҳамкорликдаги режаларга эътибор қаратилди.
Мулоқотда президент бошчилигида Ўзбекистонда амалга оширилаётган барча соҳалардаги ислоҳотлар “Инсон қадри учун” деган эзгу тамойил асосида ташкил этаётгани алоҳида таъкидланди. Бу борадаги ишлар Сара Минакара томонидан ҳам эътироф этилди.
Учрашувда томонлар Ўзбекистонда инклюзив жамиятни ривожлантириш ва ногиронлиги бор шахсларнинг барча соҳалардаги фаоллигини оширишга доир чора-тадбирларни муҳокама қилди.
Шунингдек, ногиронликни олдиндан аниқлаш ҳамда коррексия қилиш, тиббий моделдан инклюзив моделга ўтиш ва сифат даражасини халқаро стандартларга мослаштириш масалалари кўриб чиқилди.
Шу билан бирга, имконияти чекланган шахслар учун мақбул муҳитни яратиш, жамиятда мавжуд стереотипларни бартараф этиш ҳамда бу борада давлат ва нодавлат ташкилотларининг вазифалари хусусида фикр алмашилди.
Изоҳ (0)