Хитойнинг Вашингтондаги элчихонаси матбуот котиби Лиу Пенгю Хитой АҚШнинг бир томонлама ноқонуний санкцияларига қатъий қаршилигини айтди. Бу ҳақда Deutsche Welle хабар берди.
АҚШ Молия вазирлиги баёнотига кўра, санкцияга киритилган Хитой корхоналари Россияга қурол ишлаб чиқариш ёки ҳарбий дастурларни амалга ошириш учун асосий компонентларни олишда ёрдам берган.
Хитой ҳукумати қонунлар ва меъёрларга мувофиқ икки мақсадли товарлар экспортини назорат қилади, Хитой ва Россия ўртасидаги савдо-иқтисодий ҳамкорлик эса Жаҳон савдо ташкилоти қоидалари ва бозор тамойилларига мос келади, — дейди Хитой расмийси.
Вашингтон томонидан Украинадаги уруш сабабли Россияга қарши жорий қилинган янги санкциялар пакетига Хитойда рўйхатдан ўтган 20 та компания, шунингдек, БАА, Туркия, Озарбайжон, Бельгия, Словакиядаги компаниялар киради. 200 дан ортиқ Россия компаниялари санкциялар рўйхатида. Чеклов чоралари визани тақиқлаш, молиявий активларни музлатиш ва санкцияланган компаниялар билан бизнес юритишни тақиқлашни кўзда тутади.
АҚШ Хитой компаниялари Россияга дронлар яратиш учун эҳтиёт қисмлари, порох ва ракета ишлаб чиқариш учун зарур бўлган портловчи моддаларни яратиш учун товарлар экспорт қилганига аниқлик киритган. АҚШ молия вазирига кўра, янги чекловлар Россиянинг ҳарбий ҳаракатларини янада заифлаштиради.
Аввалроқ Вашингтон Пекинни Ғарб санкцияларини четлаб ўтишда Россия мудофаа саноатини қўллаб-қувватлашга йўл қўймаслик ҳақида бир неча бор огоҳлантирган.
Хитой бу масалада бетараф эканини айтиб, Москва билан савдо ҳамкорлигини қонуний деб атаган. Пекин ҳеч қандай учинчи томон бу ҳамкорликни бузолмаслигини таъкидлаган.
Изоҳ (0)