Наманган вилоятининг Янгиқўрғон туманидаги боғчаларда тарбиячиларга концертга мажбурий тарзда билет сотилаётгани хабар берилди. Бу ҳақда “Дарё”га маълум қилган манбанинг айтишича, билет нархи 80 минг сўм.
“Менинг қизимга ишхонасидан мажбурий тарзда билет беришибди. Ўзи арзимаган ойликка ишлашса, ҳали ойлик олишмаса-да, билет сотиб оласизлар деб мажбурлашаётган экан. Ишонсангиз, гўшт сотиб олиб ейишга, пулимиз етмаяпти. Шу иш адолатданми?”, — дейди билет олишга мажбурланаётган ишчининг онаси.
“Дарё” мазкур ҳолат юзасидан Наманган вилояти Мактабгача ва мактаб таълими бошқармаси ахборот хизмати вакили Саидолим Абдураҳмонов билан суҳбатлашди.
“Бу ҳақида хабарим йўқ экан. Концерт бўлишини ҳам сиздан эшитяпман. Ҳолат ҳақида суриштириб, маълумот берамиз”, — дейди журналистнинг бу ҳақидаги саволларига жавоб берган Саидолим Абдураҳмонов.
Янгиқўрғон тумани ҳокимлиги ахборот хизмати раҳбари Камола Жўрабоеванинг маълумот беришича, ҳақиқатан ҳам туман Мактабгача ва мактаб таълими бўлимига Аваз Охуннинг 2023 йил 16 июнь куни бўлиб ўтиши режалаштирилган концертига 100 та билет берилган.
“Аммо 100 та билет концертга тушишни истовчилар учун берилган. Мажбурий сотилаётгани ҳақидаги гап ёлғон. Бўлим мудири ўринбосарининг айтишича, 100 та билетдан атиги 4 таси сотилган. Шу тўртта билетнинг пули ҳам қайтариб берилади. Боғчаларга билет сотилмайди”, — дейди ҳокимлик ахборот хизмати раҳбари Камола Жўрабоева.
“Дарё” мухбири билетда номери кўрсатилган масъуллар билан ҳам боғланди.
Ўзини Ҳусниддин Умаров деб таништирган билет сотувчисининг айтишича, билетлар “Ўзбекконцерт”нинг Наманган вилояти бўлими томонидан шартномага кўра, боғчаларга берилган бўлиши мумкин.
“'Ўзбекконцерт'нинг вилоят бўлими боғчалардаги тадбирларни ташкил қилишда боғчаларга ёрдам бергани учун 'Ўзбекконцерт'нинг вилоят бўлими билан шартнома қилади. Бу билетлар шу шартномага кўра, боғчаларга берилган бўлиши мумкин”, — дейди “Ўзбекконцерт”нинг вилоят бўлимида ишлашини айтган Ҳусниддин Умаров.
“Ўзбекконцерт”нинг вилоят бўлими масъули Муроджон Қудратов эса Ҳусниддин Умаровнинг гапини рад этиб, билет сотиш масаласига “Ўзбекконцерт” вилоят бўлимининг алоқаси йўқлигини билдирди.
“Биз концерт ташкилотчиларига ижарага концерт зал бердик. Биз билет сотмаймиз. Тўғри, билетлар мажбурий сотилмаслигини назорат қиламиз. Аваз Охуннинг концертига билетлар мажбурий сотилаётганидан хабаримиз йўқ экан”, — дейди Муроджон Қудратов.
Муроджон Қудратовнинг қўшимча қилишича, Аваз Охуннинг вилоятда бўлиб ўтиши режалаштирилаётган концертини тадбиркор ташкил қилаётган бўлиб, билетларнинг мажбурий сотилиши тадбиркорга бориб тақалиши мумкин.
Концерт ташкилотчиси бўлган тадбиркор Баҳодир Ўринбоевнинг “Дарё”га маълумот беришича, у Мактабгача ва мактаб таълими бўлими масъулига у 100 та эмас, 200 та билет берган.
“Ёрдам берамиз дейишганига бўлим раҳбарига 200 та билет бергандик. Аммо билетлар мажбурий сотилаётганидан хабаримиз йўқ экан. Биз билетларнинг мажбурий сотилишига қаршимиз. Агар билетларни мажбурий сотишга ҳаракат қилганимизда Telegram каналларида концерт ҳақида эълон бермас эдик. Битта билет мажбурий сотилса ҳам, бизнинг қилаётган меҳнатларимиз куйган бўлади. Ҳолатга аниқлик киритиб, бўлимга берилган 200 та билетимизни қайтариб оламиз”, — дейди тадбиркор.
Изоҳ (0)