Қизиқчи Аваз Охун илк яккахон концертини бундан роппа-роса 10 йил аввал “Туркистон” санъат саройида “Янгисини эшитдингизми?” номли дастур билан бошлаганди. Йил сайин унинг мухлислари билан бирга концерт сеанслари ҳам ортиб бораверди. Қизиқчининг таклифига кўра, “Дарё” жамоаси 10 йиллик юбилей концертига ташриф буюрди ва саҳна орти жараёнлари ҳақида репортаж тайёрлади.
Қизиқчини қўллаб-қувватлаш учун концертга ҳамкасблари, шоу-бизнес олами вакиллари ташриф буюришди. Зокир Очилдиев концертнинг биринчи кунига таклифнома берилмаган бўлса-да, Аваз Охунни қўллаб-қувватлаш учун келганини ва уни рақобатчи эмас, ука сифатида ҳурмат қилишини айтиб ўтди.
Аваз Охун аввалги концерт дастурларида меҳмон санъаткор сифатида ёш истеъдодларни саҳнага олиб чиқарди. Бу сафар эса Ботир Қодиров концерт меҳмони бўлди. У жонли ижродаги қўшиқлари билан мухлисларни қувонтирди.
Аваз Охун ўз қадриятларига амал қиладиган ижодкор. Шу кунгача унинг бирорта яккахон концерт дастури Ўткир Сиддиқов бошловчилигисиз ўтмаган. Қизиқчи бу анъанага содиқлигини устози Ҳожибой Тожибоев билан боғлайди. Яъни Ўткир Сиддиқов марҳум ижодкорнинг ҳам концертларига бошловчилик қиларди.
Аммо бу йилги концерт Ўткир Сиддиқовнинг иштирокисиз бошланди.
— Устоз 80 ёшни қаршилаб қолган, бугун катта саҳнада у кишига тўн кийдиришни ният қилгандим. У инсон ниҳоятда масъулиятли, бирор марта концертларга кеч қолмаган. Афсуски, концертнинг биринчи кунида йўллар бир оз тирбандлиги учун асабийлашиб, шошиб келди. Бу ҳолат ўз-ўзидан соғлиғига ҳам таъсир этган. Шу боис саҳнага чиқмай, уйга кетганлари яхши деб ўйладик. Ишонамизки, қолган сеансларда устоз билан билан бирга бўлади, — дейди Аваз Охун.
Концертдаги кўтаринки руҳни бир сўз билан ифодалаб бўлмайди. Уни кўриш ёки у ҳақда тайёрланган махсус репортажни томоша қилиш керак. Шундай экан “Дарё”нинг YouTube’даги каналига кириб, видеони тўлиқ ҳолда томоша қилинг.
Изоҳ (0)