Кўча-кўйда бир хил кийинган, ташқи кўриниши ҳам бир-бирига ўхшаш болакайларни кўрсангиз, ҳавас билан ўтишингиз аниқ. Чунки оиланинг қувончи — фарзанд, агар улар эгизак бўлса, бу бахтни ота-онаси икки карра кўпроқ ҳис қилиш имконини беради. Ўзбек шоу-бизнеси вакиллари орасида бу бахтни ҳис қилаётганлар кўплаб топилади.
Ёдгора Зиёмуҳаммедова
Умрини ёш томошабинлар учун бағишлаган устоз санъаткор, Ўзбекистонда хизмат кўрсатган артист Ёдгора Зиёмуҳаммедованинг уч фарзанди бўлиб, эгизак қизлари тўнғич ҳисобланади.
— Фотима ва Зуҳра 1977 йилнинг май ойида ўн дақиқа фарқ билан дунёга келган. Улар муддатидан олдин, яъни етти ойлигида туғилган. Шу боис тўққиз ойлик бўлгунга қадар ҳаво ҳарорати бир хил хонада парваришлаганмиз. Бу борада онам ва қайнонам яқиндан кўмаклашган.
Эгизакларнинг иккисига ҳам тенг муомала қилиб, кўнглига бирдек қараш керак. Масалан, Фотима бирор воқеани айтгач, ҳеч қанча вақт ўтмай, Зуҳра ҳам худди ўша воқеани сўзлаб берса, биринчи эшитиб тургандек, жим тинглашга мажбурсиз. Қизларимни ҳозиргача хафа қилмасликка ҳаракат қиламан. Уларни бирин-кетин турмушга узатганман. Зуҳранинг уч қизи, Фотиманинг эса икки ўғил фарзанди бор. Бугунги кунда Фотима ва Зуҳра “Тантана” болалар ашула ва рақс ансамблида раҳбарлик лавозимида фаолият юритади, — дейди Ёдгора Зиёмуҳаммедова.
Юлдуз Ҳамидова
“Темир аёл”, “Тангалик болалар”, “Чавандоз”, “Туташ тақдирлар” каби фильм ва сериаллардаги роллари билан танилган Ўзбекистонда хизмат кўрсатган артист Юлдуз Ҳамидованинг ҳам эгизак қизлари бор. Актриса бир йилдан бери Американинг Лос-Анжелес шаҳрида яшаб келмоқда. Океан ортига кетишига фарзандлари — Фотима ва Зуҳра сабаб бўлган.
— Қизларимга беш ёшлигидан инглиз тилини ўргатганман. Улар Тошкентда инглиз тили чуқурлаштирилган мактабни тамомлагач, хорижда ўқишни давом эттиришни исташди. Аввал Малайзияга, кейин АҚШга ўқишга келишди. Америкага қизларим билан келганман, — дейди актриса.
Райҳон Ғаниева
Ўзбекистонда хизмат кўрсатган артист Райҳон Ғаниева ва актёр Йигитали Мамажонов 2012 йилнинг ноябрида турмуш қурган. Жуфтлик 2014 йил май ойида эгизак фарзанд кўрган бўлиб, уларга Ислом ва Имрон деб исм қўйишган.
2016 йилнинг майида эса Райҳон ва Йигиталининг никоҳи расман бекор қилинган. Эгизак ўғиллар хонанда Райҳон қарамоғида қолган.
Аваз Охун
Оммага шахсий ҳаёти ҳақида кам гапирадиган сўз устаси Аваз Охуннинг эгизак қизлари борлигини, шубҳасиз, кўпчилик билмайди. Унинг рафиқаси 2019 йил майида Фотима ва Зуҳрани дунёга келтирган.
Тўрт фарзанднинг отаси бўлган Аваз Охун ижтимоий тармоқлардаги саҳифаларига оилавий суратларини қўймайди.
Диёрбек Бекжонов
Таниқли санъаткорлар — Меҳри ва Александр Бекжоновларнинг ўғли Диёрбек Бекжонов 2019 йили илк марта оталик бахтига эришган. Унинг Фотима ва Зуҳра исмли қизлари бор.
27 ёшли Диёрбек айни пайтда “Аристократлар” жамоаси аъзоси. У бошловчи сифатида ҳам ўз мухлисларига эга.
Абдураҳмон Мавлонов
“Дизайн” кулги жамоаси аъзоси Абдураҳмон Мавлоновнинг эгизак фарзандлари 2017 йил 18 июнь куни туғилган. Instagram саҳифаси орқали қўшалоқ ўғилли бўлганини маълум қилган актёр нафақат Ҳасан ва Ҳусанни, балки оилавий суратларини ҳам ижтимоий тармоқларга жойламайди.
Улуғбек Холиқов
Хонанда Улуғбек Холиқовнинг эгизак фарзандлари 2021 йилнинг май ойида туғилган. Бир ўғил ва бир қиз эгизакларга қўшиқчининг яқинлари Марям ва Муҳаммадамин деб исм қўйган.
Малика Авазова
Ўзбекистон давлат драма театри актрисаси Малика Авазова эгизак фарзандларни дунёга келтирди. У тўрт йилдан буён фарзандли бўлишни интизор бўлиб кутгани ва уни қўллаб-қувватлагани учун турмуш ўртоғидан миннатдор эканлигини айтиб ўтди.
— Аллоҳимдан битта фарзанд сўрагандик, иккита фарзанд билан сийлади. Турмуш ўртоғим билан бирга тўрт йил давомида фарзандли бўлишни кутдик. Ўзбекчиликда ҳар хил гап-сўзлар бўлади, уларни енгишимда турмуш ўртоғимнинг далдаси катта бўлди. Қайнотам раҳматлининг исми Ҳасан бўлган, улар ҳам эгизак бўлишган экан. Такрор бўлмасин, бобосининг исмини ўғилларимизга қўймайлик, деб бошқа исм қўйишга қарор қилдик. Ўғилларимизга Муҳаммадали ва Муҳаммадамин деб исм қўйдик, — дейди Малика Авазова.
Умида Норбоева
“Исканжа” ва “Денгиз гули” сериалларидаги иштироки билан томошабинларга яхши таниш бўлган актриса Умида Норбоева ҳам 12 йил деганда ҳомиладор бўлди. У Instagram саҳифасига видео жойлаб, қувончли хабарни кузатувчилари билан бўлишди.
— Кимдир бефарзанд эканлигимни билади, кимлардир йўқ. Аммо мен ҳомиладор бўлишни 12 йил кутдим. “Қачон ҳомиладор бўлар эканман? Бу бахт менга насиб этадими?” деб кўп ўйлардим. Шукрки, 12 йилда бўлса-да, бу бахт насиб этди. Эгизак қиз фарзандли бўлдим, — дейди актриса Умида Норбоева.
Изоҳ (0)