Абхазия президенти Аслан Бжания мухолифат босими остида истеъфога чиқди. Парламентни эгаллаб олган мухолифат билан келишилган ҳолда ҳукумат раҳбари ҳам лавозимидан кетади.
“Мамлакатда барқарорлик ва конституциявий тартибни сақлаш мақсадида, Абхазия республикаси конституциясининг 63-моддасига мувофиқ, мен Абхазия президенти лавозимидан истеъфога чиқаман”, дейилади Бжаниянинг парламент спикери номига йўллаган хатида.
Давлат раҳбари вазифасини бажарувчи вице-президент Бадра Гунба, бош вазир вазифасини бажарувчи эса илгари ушбу лавозимни эгаллаган Валерий Бганба бўлади. Ҳукумат ва мухолифат музокараларда тегишли келишувга эришган. Намойишчилар 19 ноябрь куни ҳукумат мажмуасини тарк этиши керак. Акс ҳолда Бжания истеъфосини қайтариб олади.
Абхазиядаги намойишлари
Абхазия пойтахтида тартибсизликлар бир ҳафта олдин бошланган. 15 ноябрь куни Абхазия парламенти Россия билан янги инвестиция битимини кўриб чиқиши керак эди. Маҳаллий аҳолининг аксарияти Россия бизнесининг кенгайиши уларнинг туризмдаги даромадидан маҳрум қилишидан хавотирда.
16 ноябрь куни намойиш иштирокчилари баёнот берди. Улар ҳукумат биноларини эгаллаш Абхазиянинг Россия билан яқин алоқаларига қарши қаратилмаганини айтишди. Аммо Бжанияни “бу алоқалардан шахсий ғаразли манфаатлари йўлида фойдаланишга уриниш ва ўз режимини кучайтириш учун уларни манипуляция қилишда” айблашди.
17 ноябрь куни агар Абхазия президенти Аслан Бжания истеъфога чиқмаса, мухолифат муваққат ҳукумат тузишини эълон қилди.
Изоҳ (0)