Грузия 2030 йилда Абхазия ва Жанубий Осетияни ўз таркибига қайтармоқчи ва Европа Иттифоқига аъзо бўлмоқчи. Бу ҳақда Грузия бош вазири Ираклий Кобахидзе хабар берди.
Бизнинг, грузияликларнинг орзуси – 2030 йилгача абхаз ва осетин биродарларимиз билан бирлашган ва кучли Грузияда яшаш. Бирлашган ва кучли Грузия 2030 йилда Европа оиласининг тўлақонли аъзосига айланиши керак, — дейди Кобахидзе Х ижтимоий тармоғидаги постида.
Бош вазир ўз постида, шунингдек, мамлакат ичида ва хорижда истиқомат қилаётган Грузия фуқароларини Мустақиллик куни билан табриклаган.
Кобахидзе аввалроқ мамлакат 2030 йилда Европа Иттифоқига аъзо бўлишга бошқа номзод давлатларга қараганда кўпроқ тайёр бўлишини айтган эди. Шу билан бирга, Грузиядаги хорижий агентлар тўғрисидаги қонуннинг қабул қилиниши билан боғлиқ сўнгги воқеалардан сўнг, Европа расмийлари мамлакат демократик йўлдан оғишса, Европа Иттифоқига интеграциялашуви тўхтатилиши ҳақида ёзган.
2023 йил декабрида Европа Иттифоқи Грузияга аъзолик номзоди мақомини берган ва ЕИга кириш бўйича музокараларни бошлаш учун тўққиз босқични белгилаб берган.
Изоҳ (0)