Россия ҳукумати Тбилисидан мустақиллигини эълон қилган Абхазиянинг Грузия билан чегарасида ҳарбий денгиз базаси қуриш устида иш олиб бормоқда. Бу ҳақда Грузия президенти Саломе Зурабишвили берган баёнотга асосланиб, Anadolu нашри хабар берди.
Грузия томони берган маълумотларга қараганда Россия аллақачон база қуриш ишларини бошлаган. Бунинг учун Очамчира шаҳрининг соҳилбўйи ҳудуди танланган.
“Очамчира базаси учун (Россия томонидан) дастлабки ишлар олиб борилмоқда. Бу жиддий муаммо, чунки бу нафақат бизга, балки бутун Қора денгиз минтақаси мамлакатлари хавфсизлигига таҳдид олиб келади”, деган Саломе Зурабишвили Тбилисида оммавий ахборот воситаларига берган интервьюсида.
Россиянинг Грузиядан ажралган ҳудудда янги доимий база ташкил этиш қарорини танқид қилган Зурабишвили мамлакат бош вазири Ираклий Кобахидзе ва унинг ҳукуматини Абхазия, шунингдек, Жанубий Осетия минтақасига нисбатан самарали сиёсат олиб бормаётганликда айблаган. Грузиянинг бу икки минтақа борасида ҳеч қандай аниқ дастури йўқлиги ва муносабатлар ёмонлашуви давом этаётгани танқид қилинган.
Зурабишвили ўз нутқида Абхазия ва Жанубий Осетия аҳолисига Грузия фуқаролигини бериш керак эканлигини айтган. Бу тадбир икки алоҳида ҳудудни яна қайта Тбилисига интеграция қилиши мумкинлигини маълум қилинган.
Россия ҳукумати ҳозирча Грузия расмийсининг янги фуқаролик борасидаги баёнотига муносабат билдирмаган. Абхазиядаги янги база ҳақида эса на рус давлат нашрлари ва на маҳаллий матбуот маълумот тақдим этмаган.
Ҳозирда Россия бевосита таъсирга эга бўлган Абхазия ва Жанубий Осетия 2008 йилда Грузиядан мустақиллик эълон қилган. Бу воқеадан кўп ўтмай Москва икки ҳудуд мустақиллигини тан олган. Бунга жавобан эса Грузия Россия билан алоқаларини узган. Абхазия ва Жанубий Осетия ҳукуматлари ҳозирда нисбатан мустақил, Россия билан ҳамкорликда сиёсат юритса-да, халқаро ҳамжамият уларни ҳануз Грузия таъсир доираси деб тан олади.
Россия 2008 йилдан кейин Абхазия билан кўплаб савдо, транспорт ва ҳарбий келишувлар тузган. Ҳудудни Россияга интеграция қилишга ҳаракат қилинди. Ҳаттоки Абхазиянинг айрим вакиллари Россия билан бирлашиш ғоясини тарғиб қила бошлади.
2023 йилнинг октябрь ойида Россия ва Абхазия ҳукуматлари Очамчира туманида Қора денгиз флотига қарашли ҳарбий-денгиз иншоотини ташкил этиш бўйича келишувга эришган. Қурилиш ишлари қачон бошланиши эса хабар қилинмаган эди. Қора денгиз ҳудудининг кўплаб мамлакатлари ўша пайтда келишувга муносабат билдириб, Грузияга босим қилмасликни, Абхазияда ҳарбий иншоотлар жойлаштирмасликни талаб қилган.
Изоҳ (0)