Абхазия ўз келажагини Россия ва Беларусь билан иттифоқ давлатида кўради. Абхазия ташқи ишлар вазири Инал Ардзинба 5 март куни ушбу баёнотни эълон қилди. Бу ҳақда “ТАСС” нашри хабар берди.
“Биз Иттифоқ давлатига олиб борадиган йўл жуда узоқ ва қийин эканлигини тушунамиз, аммо аҳолимизнинг катта қисми бундай ёндашувни қўллаб-қувватлайди”, — дея баёнот берган Абхазия ташқи ишлар вазири.
Вазирга кўра, бугунги кунда Абхазиянинг асосий вазифалардан бири Беларусь лойиҳасидир. Гарчи Беларусь ва Абхазия ўртасида ҳозирча дипломатик алоқаларимиз ўрнатилмаган бўлса-да, давлат раҳбарлари ўзаро давлат ташрифлари ташкил эта олишган.
Абхазия расмийсига кўра, мамлакат ўз келажагини Россия билан иттифоқда кўради. Абхазиянинг барқарорлиги кўп жиҳатдан Россияга боғлиқ.
Хабарда келтирилишича, Абхазия Донбассга гуманитар ёрдам ва ахборот ёрдамини кучайтиришни режалаштирмоқда. Мамлакат Россиянинг махсус операциясини тўлиқ қўллаб-қувватлаши айтилган.
Маълумот ўрнида, даставвал Грузия таркибида бўлган Абхазия 2008 йил 26 августда ўз мустақиллигини эълон қилган. Шундан бери мамлакат мустақиллигини Россия, Венесуэла, Никарагуа, Науру ва Сурия каби давлатлар тан олган бўлса-да, БМТга аъзо бўлган деярли барча мамлакатлар уни Грузиянинг таркибий қисми деб билади.
Изоҳ (0)