Туркия президенти Ражаб Тоййиб Эрдўғон мамлакат Исроилни дунёга ҳарбий жиноятчи сифатида намойиш қилишини айтди. Бу ҳақда Anadolu хабар берди.
Эрдўғон Истанбулда бўлиб ўтган “Буюк Фаластин митинги” иштирокчиларига мурожаатида Исроил 22 кундан бери ҳарбий жиноятлар содир этаётганини айтди. Президент Туркия ундан ёрдам сўраб мурожаат қилганларга ҳар доим ёрдам қўлини чўзишини, бугун Ғазо ёрдамга муҳтож эканини таъкидлади.
“Украина-Россия урушида ҳалок бўлган тинч аҳоли учун ‘тимсоҳ кўз ёшларини’ тўкканлар бугун Ғазо секторида минглаб бегуноҳ болаларнинг ўлимини жимгина кузатмоқда”, — деди у.
Эрдўғон Исроилни Фаластин ерларининг “босқинчиси” деб атаб, Исроил ва Фаластиннинг 1947 йилдаги жойлашувига эътибор қаратди.
“Исроил кун келганда минтақада қурбонликка олиб келинадиган пиёда эканини ҳамма билади”, — деди Эрдўғон.
Президент Фаластиннинг ҲАМАС ҳаракати террорчи ташкилот эмаслигини айтганида Исроил жуда хавотирланганини билдирди.
“Қримдан Қорабоғгача, Босниядан Киркуккача, Фаластиндан Туркистонгача, Афғонистондан Чеченистонгача бўлган кўплаб ҳудудлар аҳолиси учун кўз ёш тўкдик. Бугунги кунда бир қанча одамлар Ғазони бизга ҳеч қандай алоқаси бўлмаган олис жой деб билади. Афсуски, бу ҳақда ҳатто очиқ гапиришади”, — деди сиёсатчи.
Туркия раҳбарига кўра, мамлакатнинг тўрт томонида ва ҳатто чегараларидан ташқарида тузилган бирор-бир воқеа, бирор инқироз, бирорта ҳам иттифоқ Туркияга қарши ўйналаётган ўйинларнинг бир қисми эмас.
“ҲАМАС террорчи ташкилот эмаслигини айтдим ва Исроил бундан жуда хавотирда. Ғолиб фақат Аллоҳдир. Бу ерда биз нафақат Ғазо секторидаги хунрезликни қоралаймиз, балки ўз мустақиллигимиз ва келажагимизни ҳимоя қиламиз”, — деди Эрдўғон.
У Исроилни “босқинчи” “ташкилот” деб атади.
“Шунинг учун турк халқи буни билади. Ғарб сизга қарздор, лекин Туркия қарздор эмас. Шунинг учун бемалол гапирамиз. Эрдўғон буни Туркиянинг сизга қарзи йўқлиги учун айтмоқда”, — деб таъкидлади у.
Исроил қандай муносабат билдирди?
Исроил Ташқи ишлар вазирлиги Эрдўғоннинг баёнотидан сўнг барча турк дипломатларини мамлакатдан чиқариб юборишни буюрди. Исроил—Туркия муносабатлари қайта кўриб чиқилиши қайд этилди. Шунингдек, Исроил ҳам Туркиядаги дипломатларини чақириб олишини билдирди.
Изоҳ (0)