Коррупцияга қарши курашиш агентлиги директори Акмал Бурҳонов бошчилигидаги Ўзбекистон делегациясининг Эстония ва Финляндияга амалий ташрифи бошланди, деб хабар бермоқда “Дунё” агентлиги.
Маълум қилинишича, 17–20 апрель кунлари бўлиб ўтадиган мазкур ишчи ташриф Ўзбекистоннинг Латвиядаги дипломатик ваколатхонаси ҳамда Европада хавфсизлик ва ҳамкорлик ташкилоти (ЕХҲТ) кўмагида ташкил этилган.
Сафар давомида Ўзбекистон вакилларининг Эстония Адлия, Ички ишлар вазирликлари, Электрон ҳукумат академияси, Давлат харидлари ва давлат кўмаги бошқармаси, шунингдек, Финляндиянинг Ташқи ишлар, Адлия, Молия вазирликлари, Рақобат ва истеъмолчилар идораси ҳамда Хелсинки университети Қонун устуворлиги маркази раҳбарияти билан икки томонлама учрашувлар ўтказиши режалаштирилган.
Учрашувлар давомида ушбу давлатларда коррупцияга қарши курашиш сиёсатининг шаклланиши, давлат идораларининг соҳадаги фаолиятини мувофиқлаштириш ҳамда коррупциянинг олдини олиш, хусусан, давлат органларининг очиқлиги, шаффофлиги ва ҳисобдорлиги бўйича тажриба алмашилади ва ўзаро ҳамкорлик истиқболлари муҳокама қилинади.
Таъкидланишича, бугунги кунда Эстония электрон ҳукуматни жорий этиш ва ривожлантириш бўйича Европа ҳамда дунёда етакчилардан бири ҳисобланади. Аҳолига кўрсатиладиган давлат хизматлари сони 600 дан ортиқни, тадбиркорларга кўрсатиладиган давлат хизматлари сони эса 2 400 дан ортиқни ташкил этади.
Финляндия Transparency International халқаро ташкилотининг Коррупцияни қабул қилиш индексида 2-ўринни эгаллаб, дунёдаги энг коррупциясиз давлат сифатида эътироф этиб келинмоқда.
Изоҳ (0)