“Финляндия билан ҳамкорликда Ўзбекистонда коррупцияга қарши курашиш бўйича узоқ муддатли стратегия ишлаб чиқилади” — Акмал Бурҳонов

Ўзбекистонда коррупцияга қарши курашишда Эстония ва Финляндия тажрибаси қўлланади. Бу ҳақда Коррупцияга қарши курашиш агентлиги директори Акмал Бурҳонов 17—20 апрель кунлари Эстония ва Финляндияга қилган ташрифи юзасидан “Дарё”га берган қисқача интервьюсида айтиб ўтди.

Акмал Бурҳоновнинг маълум қилишича, ташриф давомида коррупцияга қарши курашишда узоқ ва ўрта муддатга мўлжалланган стратегиялар ва давлат дастурларини ишлаб чиқиш соҳасидаги тажрибалар ўрганилган.

“Учрашув натижасига кўра, бир қатор келишувларга эришилди. Хусусан, Эстониянинг Электрон ҳукумат академияси билан биргаликда йирик ҳамкорлик лойиҳасини ишлаб чиқиш ҳамда амалга оширишни режелаштиряпмиз. Ушбу лойиҳа доирасида Ўзбекистонда ижтимоий аҳамиятга эга бўлган, яъни очиқланиши лозим бўлган маълумот кўламини кенгайтириш ва аҳолига давлат хизматларини кўрсатишда бюрократия ҳамда коррупциявий омилларни йўқ қилиш бўйича ишлар амалга оширилади”, — деди Коррупцияга қарши курашиш агентлиги директори.

Унинг алоҳида таъкидлашича, Финляндия Ташқи ишлар вазирлиги кўмагида Ўзбекистонда ҳуқуқ устуворлиги йўналишида катта лойиҳани ишга туширишга келишиб олинган.

“Мазкур лойиҳа Финляндиянинг Қонун устуворлиги маркази билан бирга амалга оширилади. Энг аввало, Ўзбекистонда коррупцияга қарши курашиш бўйича узоқ муддатли стратегияни ишлаб чиқиш ва амалиётга жорий этиш кўзда тутилган. Шунингдек, мамлакатимизда давлат идора ва корхонларида коррупцияга қарши ички тузилмалари фаолиятини такомиллаштиришга қаратилган”, — деди Акмал Бурҳонов.

Таъкидланишича, бугунги кунда Эстония электрон ҳукуматни жорий этиш ва ривожлантириш бўйича Европа ҳамда дунёда етакчилардан бири ҳисобланади. Аҳолига кўрсатиладиган давлат хизматлари сони 600 дан ортиқни, тадбиркорларга кўрсатиладиган давлат хизматлари сони эса 2 400 дан ортиқни ташкил этади.

Финляндия Transparency International халқаро ташкилотининг Коррупцияни қабул қилиш индексида 2-ўринни эгаллаб, дунёдаги энг коррупциясиз давлат сифатида эътироф этиб келинмоқда.

• Ўзбекистонда вазирлик ва давлат ташкилотларининг очиқлик индекси эълон қилинди
• Антикоррупция агентлиги раҳбари 2023 йилгача кимлардан ва қандай совғалар қабул қилгани очиқланди