Ўзбекистондаги мактаб ва ОТМларда ҳалолликни тарғиб қилишга қаратилган махсус ўқув дастур ишлаб чиқилади

Ўзбекистонда Сингапур тажрибаси асосида ёшлар, шу жумладан, мактаб ва олий таълим муассасаларида ҳалолликни тарғиб қилишга қаратилган махсус ўқув дастур ва қўлланмалар ишлаб чиқилади. Бу ҳақда Коррупцияга қарши курашиш агентлиги директори Акмал Бурҳонов маълум қилди.

Қайд этилишича, агентлик ходимлари Сингапурда Коррупция амалиётларини тергов қилиш бюроси, Бош прокуратура, PCB Академияси, Ли Куан Ю номидаги Давлат сиёсати мактаби каби ташкилотларга ташриф буюриб, ҳамкорлик бўйича музокаралар ўтказди.

Музокаралар давомида бир қатор масалалар муҳокама қилиниб ва келишувларга эришилди. Хусусан:

• Сингапурнинг коррупцияга оид жиноятларнинг олдини олишга қаратилган чораларни миллий амалиётга татбиқ этиш;
• Сингапур тажрибаси асосида ёшлар, шу жумладан, мактаб ва олий таълим муассасаларида ҳалолликни тарғиб қилишга қаратилган махсус ўқув дастур ва қўлланмалар ишлаб чиқиш;
• Ўзбекистонда замонавий аксилкоррупция механизмларини ишлаб чиқишда Сингапур аксилкоррупция бюроси экспертларини жалб қилиш;
• Сингапур амалиёти асосида хусусий сектор вакиллари ҳамда давлат идоралари молия ва иқтисод соҳасидаги ходимлар учун реал кейслар асосида қонунбузилиши ҳолатларини бартараф этиш усулларини муҳокама қилиш ва бу йўналишда стандартларни жорий этиш;
• Ўзбекистон давлат идоралари раҳбар кадрлари учун Ли Куан Ю номидаги Давлат сиёсати мактабида махсус ўқув курсларини ташкил қилиш;
• давлат хизматчиларини Сингапур тажрибаси асосида қисқа муддатли курсларда малакасини ошириш;
• ҳамкорликда коррупциявий жиноятларни тергов қилиш бўйича терговчилар малакасини оширишга қаратилган лойиҳани ишга туширишга келишилган.

Бундан ташқари, прокуратура идораларига ходимларни ишга қабул қилиш ва лавозимга тайинлаш, шунингдек, коррупцияга оид ишларнинг судда кўрилиши ва унда прокурор иштироки бўйича Сингапур тажрибаси ўрганилиб, таҳлил қилинади.

Маълумот учун, Сингапур коррупцияга қарши курашиш соҳасида илғор тажрибага эга бўлиб, тегишли рейтинглар бўйича дунёда етакчи ўринни эгаллаган давлат ҳисобланади. Хусусан, Transparensy International халқаро ноҳукумат ташкилотининг 2022 йил якунлари бўйича Коррупцияни қабул қилиш индексида Сингапур 180 та давлат орасида 5-ўринни эгаллаган.