Ўзбекистонда маҳаллий ҳокимликлар қабул қилаётган аксар ёпиқ қарорлар қонунчиликка зид. Бироқ уларга жавобгарлик йўқ. Бу ҳақда Коррупцияга қарши курашиш агентлиги директори Акмал Бурхонов “Лолазор” подкастидаги чиқишида маълум қилди.
Акмал Бурхоновнинг айтишича, 2023 йилда маҳаллий ҳокимликлар томонидан 115 мингта қарор қабул қилинган.
“Шундан 43 мингтаси ёпиқ бўлган. Улар қонунчиликка зид. Қонунда фақатгина шахс, васийлик ва хомийликка доир маълумотлар ёпиқлигига рухсат берилган. Э-қарор назорати Адлия вазирлигида. Биз вазирликдан ёпиқ қарорларни олиб, 194 тасини ўргандик. Қарабсизки, ичида шахсга доир маълумот бўлмаган, аксинча бино қуришни молиялаштириш, рағбатлантириш бўйича қарорлар ёпиқ тарзда қабул қилинган. Масалан, Лазиз акага ойликни кўп беряптида, шахсга доир деб, қарорни ёпиб қўйяпти. Қарорларни шахсга доир, деган ниқоб остида ёпиқлаяпти”, деди агентлик расмийси.
Акмал Бурҳонов мазкур муаммони ҳал этиш бўйича таклифлар илгари сурилганини қўшимча қилди.
“Биз Адлия вазирлиги ва бошқа идоралар билан бирга ёпиқ қарорларни тартибга солиш борасида раҳбариятга таклиф киритдик. Биринчидан, қарорларни ёпиқ ҳолда қабул қилиш бўйича аниқ тартиб ишлаб чиқиш назарда тутилди. Иккинчидан, қарорни ёпиқ қилишдан олдин Коррупцияга қарши курашиш агентлиги билан келишиш мажбуриятини юклаш таклифи берилди. Яъни биз: “тўғри, бу қарор ҳақиқатан ҳам ёпиқ экан”, десак, ҳужжат кейин ёпиқ ҳолга келтирилиши назарда тутилмоқда. Ҳозир қарорларни хоҳлаганча ёпиб ташласа ҳам ҳеч қанақа жавобгарлик йўқ. Масалага жиддий киришилган. Бу раҳбарият даражасига кўтарилган масала ва бизга топшириқ бўлган. Такифлараримиз яқин кунларда давлат раҳбари томонидан қўллаб–қувватланса, қонунчиликка ўзгартириш киритилиб, ўзгариш бўлади. Тасаввур қилинг, қарорларнинг 30 фоиздан кўпи ёпиқ. Бу бюджет пулини хоҳлаганча сарфлашади дегани”, – дея таъкидлади масъул.
Аввалроқ Ўзбекистонда 2023 йили коррупцияда судланган 566 нафар давлат хизматчиси қайта ишга кириб, яна шу жиноятни содир этгани хабар қилинганди.
Изоҳ (0)