Ўзбекистонда 2023 йилда коррупция жинояти учун судланган 566 нафар шахс давлат хизматига қайта ишга кирган ва коррупция жиноятларини такрор содир этган. Бу ҳақда 10 сентябрь куни Қонунчилик палатаси йиғилишида депутат Умида Раҳмонова айтиб ўтди.
Депутат Коррупцияга қарши кураш агентлиги директори Акмал Бурхановга коррупционэрлар реестри қачон ишга туширилиши бўйича савол берди.
Антикоррупция агентлиги раҳбарининг сўзларига кўра, агентлик ушбу ҳужжат ва реестрни яратиш устида иш олиб бормоқда. Таъкидланишича, қонун лойиҳаси 2022 йил бошида ишлаб чиқилган бўлиб, 2023 йилда бошқа вазирлик ва идоралар томонидан маъқулланган.
“Жорий йил бошида биз лойиҳани Президент администрациясига киритгандик, лекин администрация томонидан бир қатор эътирозлар бўлди, халқаро тажрибадан келиб чиққан ҳолда янада такомиллаштириш бўйича вазифа юклатилди. Биз бу вазифалардан келиб чиқиб, қонун лойиҳасини янада такомиллаштирдик.
Шу кунларда биз яна бир марта охирги версиясини Президент администрацияси орқали Қонунчилик палатасига киритишни режалаштирдик. Ўйлайманки, шу ой охирига қадар бу қонунни сизларнинг эътиборингизга кўриб чиқиш учун киритамиз”, деди у.
Изоҳ (1)
ha deb bitta chuqurga tushaveramizmi axir aytishganku oʻrgangan koʻngil oʻrtansa qoʻymas deb