“Ан-Насср” ва Португалия терма жамоаси ҳужумчиси Криштиану Роналду миллий терма жамоада ўйнашдан бош тортаётган футболчилардан ғазабланишини айтди.
“Португалия терма жамоасида ўйнашни истамайдиган баъзи футболчилар мени жаҳлимни чиқаради. Миллий терма жамоада ўйнашдан роҳатланинг, вақт тез ўтади! Ўз мамлакатингиз ва маданиятингизни намойиш этишдан яхшироқ нарса йўқ”, дея Роналдунинг сўзларидан иқтибос келтиради Португалия футбол федерацияси матбуот хизмати.
Маълумот учун, терма жамоа таркибида Роналду Европа чемпионати ва УЕФА Миллатлар Лигасида ғолиб чиқди. Португалияда у тўрт марта йилнинг энг яхши футболчиси деб топилган. Шунингдек, Роналду Португалия терма жамоаси ва барча терма жамоалар тарихидаги энг яхши тўпурар (130 та гол) ҳисобланади.
Жорий мавсумда Криштиану Роналду “Ан-Насср” сафида барча мусобақаларда 15 та ўйинда иштирок этиб, ўнта гол ва 3 та голли узатмани амалга оширди. Футболчининг клуб билан амалдаги меҳнат шартномаси 2025 йилнинг ёзига қадар мўлжалланган. Transfermarkt порталида берилган маълумотларга кўра, футболчининг бозор қиймати 15 миллион еврони ташкил қилади.
Изоҳ (0)