“Ан-Насср” ҳамда Португалия терма жамоаси ҳужумчиси Криштиану Роналду Саудия Арабистонига кўчиб ўтишдаги қийинчиликлар ҳақидаги саволга жавоб берди.
Футболчининг сўзларига кўра, “Ан-Насср”га ўтиш унинг учун муаммо бўлмаган, чунки унинг бутун ҳаёти шундай кўчишлардан иборат бўлган.
“Менинг бутун ҳаётим қийинчиликларга тўла. Катта шаҳарда яшаш учун 11 ёшимда уйдан чиқиб кетдим. Бу мен учун осон эди. Мен Мадейрадан Лиссабонга, Лиссабондан Англияга, Англиядан Испанияга, кейин Италияга ва шундан сўнг Англияга қайтиб келдим. Мен учун кўчиш муаммо эмас”, дея жавоб берди Роналду ўзининг YouTube каналидаги суҳбат чоғида.
Маълумот учун, 39 ёшли форвард “Манчестер Юнайтед” билан шартномасини бекор қилгандан сўнг, 2023 йилнинг январидан буён “Ан-Насср”да тўп сурмоқда. Ушбу давр мобайнида 49 учрашувда майдонга тушган футболчи 51 бор рақиблар дарвозасини ишғол қилди.
Аввалроқ футболчининг YouTube’даги канали энг тез ўсувчи канал сифатида эътироф этилиб, Гиннес рекордлари китобига киритилгани, ҳозирда ушбу каналга 50 миллиондан ортиқ фойдаланувчи обуна бўлгани маълум қилинганди.
Изоҳ (0)