АҚШ президенти Дональд Трамп 6 август куни Россия раҳбари Владимир Путин билан келаси ҳафтада учрашиши мумкинлигини билдирди. Унга кўра, учрашувда Украинадаги урушини тугатиш масаласи кўриб чиқилади. Бу ҳақда CNN хабар берди.
Трампнинг билдиришича, Путин билан АҚШнинг махсус вакили Стив Виткоф ўртасидаги Москвада бўлган учрашув самарали бўлган, бироқ аниқ ютуқларга эришилмаган. АҚШ давлат котиби Марко Рубио ушбу учрашувдан сўнг Россиянинг тинчлик сулҳи учун қандай шартлари борлигини янада аниқроқ тушунганини билдирган.
Кутилаётган учрашув таклифи Путин томонидан берилган. Хусусан, Россия раҳбари олдин Трамп билан, сўнгра Украина президенти Владимир Зеленский билан уч томонлама мулоқот ўтказишни таклиф қилган. Музокаралар жойи ҳали белгиланмаган, лекин учрашув келаси бир-икки ҳафта ичида ўтказилиши режалаштирилмоқда.
“Бугун президент Путин билан жуда яхши музокаралар ўтказилди. Олдимизда урушни тугатиш учун жуда яхши имкониятлар турибди. Бу йўлнинг охири. Бунга қадар узоқ йўл босиб ўтилди, лекин у ҳали ҳамон даво этмоқда. Аммо тез орада учрашув ўтказилиши эҳтимоли катта”, деган Трамп овал кабинетда.
Трамп сўнгги кунларда агар Россия Украинада урушни тугатиш келишувига рози бўлмаса, руслардан нефть харид қиладиган давлатларга иккиламчи 100 фоизлик санкциялар жорий этиш билан таҳдид қилиб келмоқда.
Бу орада, Россия ҳужумлари Украина бўйлаб давом этмоқда. Жумладан, ўтган сўнгги суткада украиналиклардан камида 6 киши ҳалок бўлган. Запорожье вилоятидаги дам олиш масканига берилган зарбада болалар ҳам жароҳат олгани хабар қилинмоқда. Бундан ташқари, Одесса вилоятидаги газ станциясига қилинган ҳужум юзлаб оилаларни газсиз қолдирган. Зеленский бу ҳужумни қиш мавсумига тайёргарликка қаратилган қасддан зарба сифатида баҳоламоқда.
Маълумот учун, Россия ва АҚШ раҳбарлари охирги марта 2021 йилда Швейцариянинг Женева шаҳрида бўлиб ўтган саммит чоғида учрашган эди. Ўша пайтда Қўшма Штатлар президенти лавозимида Жо Байден бўлган. Дональд Трамп эса шахсан сўнгги марта Путин билан 2019 йил июнь ойида Япониянинг Осака шаҳрида ўтказилган G20 саммитида кўришган. Икки раҳбар орасидаги энг муҳим ва узун музокара 2018 йил июлида Финляндиянинг Ҳелсинки шаҳрида бўлиб ўтган.
Изоҳ (0)