Коллектив хавфсизлик шартномаси ташкилоти аъзолари бўлган Қозоғистон ва Қирғизистон ўз фуқароларининг Украинага қарши урушда иштирок этишига қарши чиқди, деб хабар беради Anadolu агентлиги.
Қозоғистонда чет мамлакат ҳудудидаги жанговар ҳаракатларда қатнашганлик учун 5 йилдан 9 йилгача қамоқ муддати кўзда тутилган. Бу республика жиноят кодексининг тегишли моддасида қайд этилган.
Қирғизистоннинг Россиядаги элчихонаси ҳам ўз фуқароларини худди шундай хатти-ҳаракатлар учун жиноий жавобгарлик кутаётгани ҳақида огоҳлантирди. Улар 5 йилдан 10 йилгача муддатга озодликдан маҳрум этилиши, шунингдек, мол-мулки ҳам мусодара этилиши мумкин.
Россияда яшовчи Қирғизистон фуқаролари қандайдир жанговар ҳаракатларда қатнашишга даъват қилинса, зудлик билан ўз мамлакати дипломатик ваколатхонасига мурожаат этишлари маслаҳат берилди.
Аввалроқ Бош прокуратура хориждаги ўзбекистонликларга мурожаат қилиб, уларни чет давлатлар ҳарбийлашган тузилмаларига ёлланиш жавобгарликка сабаб бўлишидан огоҳлантирганди. Шунингдек, Ўзбекистоннинг Россиядаги элчихонаси фуқароларни ҳарбий ҳаракатларда иштирок этмасликка чақирди.
21 сентябрь куни Россия президенти Владимир Путин Россияда қисман сафарбарлик эълон қилиш ҳақидаги фармонни имзолади. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.
Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади.
Изоҳ (0)