Қозоғистоннинг Туркистон вилояти полицияси халқаро қидирувда бўлган икки нафар Ўзбекистон фуқаросини қўлга олди. Бу ҳақда “Polisia.kz” хабар берди.
Ўзбекистонликлар Туркистон вилояти ИИБ экстремизмга қарши курашиш бўлими ходимлари томонидан аниқланган. Улардан бири уч йилдан бери халқаро қидирувда бўлган 38 ёшли фуқародир. Полиция уни Ордабасин туманида ҳибсга олган. 38 ёшли эркак Ўзбекистонда талончиликда айбланиб судланган.
Аниқланишича, у 2020 йилда колониядан қочиб, кейин Қозоғистон чегарасини ноқонуний кесиб ўтган. Ушбу факт бўйича барча ҳолатларга аниқлик киритилмоқда.
Иккинчи қўлга олинган эркак эса 30 ёшли Ўзбекистон фуқароси бўлиб, гиёҳванд моддаларни сақлаш билан боғлиқ жиноят содир этгани учун Остона шаҳар Полиция бошқармаси томонидан қидирувга берилган. Ҳозирда уларни экстрадиция қилиш масаласи ҳал қилинмоқда.
Изоҳ (0)