Олмаотадаги ҳостелда юз берган ёнғин қурбонлари орасида Ўзбекистон ва Россия фуқаролари ҳам бор. Бу ҳақда фожиа жойига етиб борган Олмаота ҳокими Эрболат Дўсаев маълум қилди.
Ўзбекистон Республикаси фуқароси ва Саха Республикаси (Россия) фуқароси борлиги тасдиқланди, — деди Дўсаев.
Кейинроқ Олмаота полицияси қурбонлардан икки нафари Ўзбекистон, яна икки нафари Россия фуқароси эканига аниқлик киритди.
Ҳодисада жами 13 киши ҳалок бўлган, улардан 9 нафари қозоғистонликлар.
Қозоғистон Фавқулодда вазиятлар вазирлиги маълумотларига кўра, вазирлик раҳбари бошчилигида мамлакат бош вазири томонидан зудлик билан тузилган ҳукумат комиссияси воқеа юзасидан тергов олиб бормоқда. Дастлабки версияга кўра, ёнғин ертўладаги ҳостел коридорида бошланган. Ушбу ертўла бир ярим ой аввал ҳостелга айлантирилгани, унинг умумий майдони 457 квадрат метр экани маълум қилинди. Ҳодиса сабаблари аниқланмоқда.
Ёнғин бошланган вақтда ҳостелда 72 киши бўлган, улардан 59 нафари бинони мустақил тарк этган. Ҳостел меҳмонларининг аксарияти хорижликлар эди.
Ёнғин ва 13 кишининг ўлими юзасидан республика Жиноят кодексининг 292-моддаси (ёнғин хавфсизлиги талабларини бузиш) билан жиноий иш қўзғатилди.
Изоҳ (0)