Хоразмда болалар уйи раҳбари уч нафар вояга етмаган тарбияланувчини 10 ой давомида вилоят адлия бошқармаси ва туман фавқулодда вазиятлар бўлими бошлиқлари билан жинсий алоқада бўлишга мажбурлагани ҳақидаги хабарлар бутун Ўзбекистон бўйлаб тарқалди. Бу ишни содир этган амалдорлар дастлаб қилмиши учун фақат озодликни чеклашдан иборат енгил жазо олган.
Ушбу воқеалар жамиятни ларзага солди, кўплаб блогерлар ва жамоат арбоблари воқеа ҳақида гапира бошлади. Педофилларга нисбатан кимёвий кастрацияни жорий этиш бўйича фикрлар ҳам билдирилди:
“Ўзбекистонда педофилларга нисбатан кимёвий кастрация қўллаш тўғрисидаги қонунчиликка ўзгартириш киритиш вақти келди”, — деб ёзди Президент Администрацияси раҳбари ўринбосари Комил Алламжонов ўзининг Telegram каналида.
Маълумот учун педофилия вояга етмаганлар билан жинсий алоқа қилишни назарда тутади. Агар бу ҳаракат вояга етмаган шахснинг розилигисиз амалга оширилса, бу зўрлаш жиноятига киради. Зўрлаш жинояти учун белгиланган жазо эса оғирроқ кўринишда бўлади
“Дарё” Марказий Осиё мамлакатларида педофилия учун белгиланган жазоларни солиштирди.
Тожикистон
2021 йилда Тожикистонда вояга етмаганлар билан жинсий алоқа қилиш бўйича 16 та ҳолат қайд этилган. Республикада жумладан, 30 ёшли эркакнинг 8 яшар қизни зўрлагани ҳақидаги воқеа шов-шувга сабаб бўлган. Ўшанда эркак вояга етмаган қизни зўрлаган, кейин эса ўлдирган. У умрбод қамоқ жазосини олди.
Ҳозир Тожикистон қонуни педофилия учун 3 йилдан 5 йилгача қамоқ жазосини назарда тутади, агар жабрланувчига ОИВ касаллиги юқтирилса — 5 йилдан 8 йилгача.
Қирғизистон
Марказий Осиёнинг ушбу давлатида максимал қамоқ муддати пастроқ — 1 йилдан 3 йилгача. Агар ҳуқуқбузарлик ота-она томонидан содир этилган бўлса, унда бу муддат 5 йилгача оширилади. Шунингдек, педофилларга ўқитувчилик ёки болалар билан боғлиқ бошқа касбда ишлаш тақиқланади.
Туркманистон
Қирғизистонда бўлгани каби Туркманистонда ҳам вояга етмаганлар билан алоқа қилиш учун максимал муддат 3 йилгача қамоқ жазоси ҳисобланади. Бундай ҳолда, тажовузкор айрим ҳолларда 3,3 минг АҚШ долларидан 9,9 минг АҚШ долларигача бўлган жарима билан жазодан қутулиши мумкин.
Қозоғистон
Бутун Марказий Осиёда педофиллар учун энг оғир жазо Қозоғистонда кузатилади. У ерда педофилияда айбланганлар 12 йилгача қамоқ жазоси олиши мумкин. Агар бола тарбияси учун масъул бўлган шахс (масалан, ота-она, ўгай ота, ўгай она ёки ўқитувчи) бола билан жинсий алоқада бўлса, у ҳолда улар 10 йилдан 15 йилгача озодликдан маҳрум қилинади ва уларга муайян лавозимларни эгаллаш тақиқланади.
Ўзбекистон
Ўзбекистон Республикасида педофилия учун 480 соатгача жамоат ишлари, 3 йилгача ахлоқ тузатиш ишлари, 1 йилдан 3 йилгача озодликни чеклаш ёки 1 йилдан 3 йилгача озодликдан маҳрум қилиш жазоси тайинланиши мумкин. Илгари ушбу жиноят учун 360 соатгача жамоат ишлари ёки 2 йилгача ахлоқ тузатиш ишлари назарда тутилган эди.
Материал “Дарё”нинг Марказий Осиёдаги мухбирлари ёрдамида тайёрланди.
Изоҳ (0)