Самарқанд вилояти ҳокимлиги матбуот котиби вилоят ҳокими Эркинжон Турдимовнинг бошқа ишга ўтаётгани ҳақида тарқалган хабарлар асоссиз эканини маълум қилди.
“Ижтимоий тармоқлардаги канал ва саҳифаларда бундай асосланмаган ахборотни тарқатмаслик сўралади.Вилоят раҳбари ўз фаолиятини одатий режимда давом эттирмоқда”, — дейилади муносабатда.
Вилоят ҳокимлиги матбуот котиби, шунингдек, кенг жамоатчиликдан ҳеч қандай асосга эга бўлмаган, турли тахмин ва талқинлардан иборат хабарларга ишонмасликни сўраган.
Сурхондарё вилояти ҳокими лавозимида ишлаб келган Эркинжон Турдимов 2018 йил июль ойида Самарқанд вилояти ҳокими этиб тайинланганди. Бунгача у 1991 йилдан 1995 йилгача “Ўзсаноатқурилишбанк”нинг ҳудудий бўлимларида фаолият кўрсатган. 1995—1996 йилларда Зарафшон шаҳар ҳокими ўринбосари, 1996 йилдан 2000 йилгача Ташқи иқтисодий фаолият Миллий банкининг Навоий бўлимида бошқарувчиси сифатида ишлаган. 2000 йилдан 2008 йилгача эса Хатирчи тумани ҳокими бўлган.
2008 йилда Қишлоқ ва сув хўжалиги вазирининг биринчи ўринбосари лавозимида фаолият кўрсатган Турдимов ўша йили Навоий вилоят ҳокими лавозимига тайинланганди. У Сурхондарё вилояти ҳокими бўлгунига қадар Навоийда фаолият кўрсатган.
Бугун, 24 август куни Шавкат Мирзиёев ислоҳотларнинг жойлардаги ижроси, аҳоли ҳаёти билан танишиш мақсадида Самарқандга жўнаб кетди. Ташриф давомида таълим масканларидаги шароитлар, янги иншоотлар, саноат корхоналари ва хизмат кўрсатиш лойиҳалари кўздан кечирилади. Мутасаддилар иштирокида вилоятни ижтимоий-иқтисодий ривожлантириш вазифалари бўйича йиғилиш ўтказиш режалаштирилган.
Изоҳ (0)