Шавкат Мирзиёев таклифига биноан 23 май куни Ўзбекистонга келган Сингапур президенти Ҳалима Яқуб ташриф дастурига кўра 25 май куни Самарқандда бўлди. “Афросиёб” поездида Самарқанд шаҳрига келган олий мартабали меҳмонни вилоят ҳокими Эркинжон Турдимов кутиб олди.
Ташриф дастлаб Имом Бухорий мажмуасини зиёрат қилиш билан бошланди. ЎзАнинг маълум қилишича, Ўзбекистон президенти маслаҳатчиси Музаффар Комилов Сингапур президентига Шавкат Мирзиёев ташаббуси билан янгидан бунёд этилаётган мазкур мажмуадаги қурилиш-бунёдкорлик ишлари, объектнинг аввалги ҳолати ҳақида маълумот берди.
Зиёратчилар учун мажмуа ва унинг атрофида яратилаётган имконият ва қулайликлар зиёрат туризмини ривожлантиришга хизмат қилиши қайд этилди.
Шундан сўнг Ҳалима Яқуб Имом Бухорий халқаро илмий-тадқиқот маркази ва бу ердаги музей фаолияти билан танишди. Шавкат Мирзиёев ташаббуси билан ташкил этилган халқаро марказда буюк алломалар, муҳаддислар мероси тадқиқ этилаётгани, қисқа вақт ичида ўнлаб тарихий китоблар нашр этилгани ҳақида маълумот берилди.
Музейдаги тарихий ашёлар, турли даврларга оид Қуръон ва бошқа муқаддас китоблар нусхалари, буюк муҳаддиснинг ҳаёти хронологик тартибда ишланган суратлар меҳмонларда катта қизиқиш уйғотди.
Сингапур президенти Ҳадис мактабида ҳам бўлди ва бу ерда фаолият кўрсатаётган ўқитувчилар ҳамда тингловчилар билан суҳбатлашди. Мактабда ҳадис илмини ўрганаётган ёшлар учун яратилган шарт-шароит ва имкониятларга юқори баҳо берилди.
Ҳадис мактабидан сўнг Сингапур президенти Амир Темур мақбарасини зиёрат қилди. Олий мартабали меҳмонга Амир Темур ҳаёти ва давлатчилик тарихи, бунёдкорлик ишлари ҳақида маълумот берилди.
Зиёратдан кейин Сингапур президенти Регистон майдонини томоша қилди. Унга мазкур обиданинг яратилиш тарихи ва уни асраб-авайлаш борасида томонидан кўрилаётган чора-тадбирлар ҳақида маълумот берилди.
“Аввало таклиф учун президент Шавкат Мирзиёевга миннатдорлик билдираман. Бу ташрифлар икки томонлама муносабатларда янги даврни бошлаши, шубҳасиз. Самарқандга сафаримиз ҳам таассуротларга бой бўлмоқда. Айниқса, Ислом оламининг қутлуғ масканларидан бири бўлган Имом Бухорий мажмуаси зиёратидан жуда хурсанд бўлдик. Бу улуғ муҳаддиснинг илмий мероси бутун мусулмон дунёсининг бойлиги, — деган шу ерда ОАВ ходимларига интервью берган Ҳалима Яқуб.
Сингапур президенти Сиёб деҳқон бозорини ҳам бориб кўрди. Ўзбекистонда етиштирилган маҳсулотлар ва миллий ҳунармандлик буюмлари харид қилди.
Шу билан Сингапур президентининг Самарқандга сафари якунланиб, Тошкентга қайтиб кетди.
Изоҳ (0)