Самарқанд вилояти ҳокими Эркинжон Турдимов вилоятда фаолият юритувчи туман ва шаҳар ҳокимларини, қолаверса ташкилот раҳбарларини огоҳлантириб, фуқаро мурожаатига доир бирорта муаммо ечилмаса, ўша соҳа раҳбари ишдан олинишини билдирди. Бу ҳақда вилоят ҳокими 2023 йилнинг 16–17 июнь кунлари Паяриқ туманида бўлиб ўтган сайёр қабулида маълум қилган.
“Ҳамма туман раҳбарлари, вилоят раҳбарлари қулоғингизга қуйиб олинг, фуқаролардан кимдир 16–17 июнь куни қабулда бўлгандим, бўлмади деб келса, унда ўша ким бўлишидан қатъи назар икки қўлим ўша раҳбар ёқасида бўлади. Қандай қабул қилсанг, шундай қабул қил, мени қизиқтирмайди сени қандай ўйлашинг”, — дейди вилоят ҳокими Эркинжон Турдимов.
Самарқанд вилояти ҳокими Паяриқ туманида бўлиб ўтган мазкур сайёр қабулида вилоят Электр тармоқлари корхонаси раҳбарини танқид қилиб, вилоят прокурорига корхона бош муҳандиси ишини кўриб чиқишни илтимос қилди.
“Сен ноинсоф главний инженер, нима, қутурганмисан? Бу янги келган экан, сен 10 йилдан бери ишлаб нима қилдинг? Нега одамлар фақат электрдан дод дейди? Мен вилоят прокуроридан ҳамманинг олдида илтимос қилиб сўрайман, бунинг жавобгарлик масаласини кўриб чиқишимиз керак”, — дейди вилоят раҳбари вилоят Электр тармоқлари корхонаси бош муҳандиси ҳақида гапирар экан.
Эркинжон Турдимов вилоят Назорат тафтиш бошқармаси масъули Ҳатамов исмли мансабдорга бу ишни текшириши кераклигини айтиб, “Ҳатамов тўлиқ ревизия қиласан, ҳамма йўналишлар бош инжинерга қаратилиши керак. Бир ҳафтадан сўнг, менга олиб келасан, менинг ҳузуримда бош инжинернинг хатти-ҳаракатлари бўйича муҳокама қиламиз”, — деди.
Самарқанд ҳокими 1 июль куни Паяриқ туманида яна сайёр қабул ўтказишини, барча раҳбарлар аҳоли мурожаатини ҳал этган бўлиши кераклигини уқтирди.
“1 июль куни, икки ҳафтадан сўнг, шанба куни шу ерда сайёр қабул ўтказамиз. Фуқароларнинг қайси бири ўтган сафар келгандим, муаммо ечилмади деса, у одам бизнинг орамизда бўлиши керакмас. Айниқса, Умид Назаров. Тушундингми? Давлатимиз раҳбари Сурхондарёда ҳамма раҳбарларни алмаштирганди. Худди шундай Паяриқда ҳам барча раҳбарларни ишдан оламиз. Фуқаролар билан мулоқот қилишга лаёқатсиз деб ишдан оламиз. Лекин тизимда ҳам ишламайсан. Тизимда ишлатмаслик шарти билан тақдимнома киритамиз”, — дейди вилоят ҳокими.
“Дарё”нинг аниқлаштиришича, Умид Назаров Самарқанд вилоят Электр тармоқлари корхонаси раҳбари вазифасида фаолият юритади.
“Ҳамманинг устидан кулиб, раҳбар келади-кетади. Мен доимий деб ўйладингми? Нимага улгурмайсан, ҳамма вилоятлар улгуради, фақат сен улгурмайсан?”, — дейди вилоят раҳбари Электр тармоқлари корхонаси бош муҳандисини танқид қилар экан.
Самарқанд ҳокими Паяриқ тумани ҳокими бошчилигидаги сектор раҳбарларига муддат бериб, туман аҳолисини қийнаб келаётган муаммоларни ечиш учун вилоятдаги ташкилот раҳбарлари ҳам уларга ёрдам беришини, бир оз муддатдан сўнг бу бўйича улар шахсан Турдимовнинг ўзига ҳисоб бериши кераклигини уқтиради.
“Тўртта сектор, айтиб қўяй, нечта мурожаат тушган бўлса, кимнинг сектори бўлса, ҳар куни сўрайсан. Вилоят раҳбарларидан ҳам сўрайсан. 10 кундан сўнг менинг олдимга бориб, мана булар мен айтган ишни бажармаяпти деб айтишинг керак. Қайси бирингнинг секторингда бўлса, ўзинг жавоб берасан, вилоят раҳбарлари устидан ҳам назорат ўрнатасан, керак бўлса вилоят раҳбарлари қабулхонангда бориб ўтиради”, — дейди Эркинжон Турдимов.
Изоҳ (0)