“Ҳудудий электр тармоқлари” АЖнинг Самарқанд ҳудудий филиали юридик бўлими бошлиғи И.С. эгаллаб турган лавозимидан озод этилди. Бу ҳақда Самарқанд вилояти ҳокимлиги ахборот хизмати хабар берди.
Вилоят ҳокими Эркинжон Турдимов раҳбарлигида “Ҳудудий электр тармоқлари” акциядорлик жамияти Самарқанд ҳудудий филиалида бўлиб ўтган муҳокамада юристни ишдан олиш масаласи кўриб чиқилган.
Ижтимоий тармоқларда юридик бўлим бошлиғи И.С.нинг сўзлари дея видеолавҳа жойлаштирилган эди ва бу ҳолат кўплаб салбий фикр ва эътирозларга сабаб бўлган. Видеода юристнинг ўзи билан бир ташкилотда ишловчи аёл Г.С.ни тўшакка таклиф қилгани, бунга рози бўлмаса, унга нисбатан Жиноят кодексининг 207- (мансабга совуққонлик билан қараш) ва 209- (мансаб сохтакорлиги) моддалари билан иш очишини айтиб қўрқитгани акс этган.
Аёлнинг ўзи Facebook саҳифасида пост қолдириб, унда жамоатчиликдан вазият бўйича ёрдам беришини сўраган. “Биз қандай жамиятда яшаяпмизки, аёллар қўлланаётган замонда ташкилотда И.С.га ўхшаганларга ем бўлсак? Нега тинч ишлашга имкон қолдирмаяпти? Айбим номусимни ҳимоя қилганимми?” — дейди у.
Муҳокама якунида АЖ бошқарув раисининг биринчи ўринбосари сўзга чиқиб, юридик бўлим бошлиғи И.С. жамиятнинг Самарқанд ҳудудий филиали директори буйруғи билан эгаллаб турган лавозимидан озод этилганини маълум қилган. Шунингдек, муҳокамада ҳудудий филиал директори ўринбосари Г.С.нинг ҳуқуқни муҳофаза қилувчи идораларга йўллаган мурожаати доирасида масалага ҳуқуқий баҳо берилиши билдирилган.
Изоҳ (0)