«Дарё»да Самарқанд вилояти ҳокими Эркинжон Турдимов бошчилигидаги делегация вакилларининг Нукус туманига сафари ва сафар давомидаги кечки овқат салкам 88 миллион сўмга тушгани хабар берилганди. Мазкур мақолага жавобан Қорақалпоғистон Вазирлар Кенгаши ва Самарқанд вилояти ҳокимлиги ахборот хизмати «Дарё»га қўшимча ахборот берди.
Самарқанд вилояти ҳокимлиги ахборот хизмати раҳбари Манучеҳр Мирзаевнинг «Дарё»га билдиришича, Эркинжон Турдимов бошчилигидаги делегация вакилларининг Нукус туманига сафари давомида вилоят томонидан 250 га яқин жамоатчилик вакиллари иштирок этган. Мазкур санадаги тадбирлар доирасида Нукус туманининг 12 та ҳудуди (10 та маҳалла, истироҳат боғи ва Самарқанд ош маркази)да самарқандликлар томонидан ош дамланиб, тушлик ташкил этилган.
Шунингдек, туманга 400 нафарга яқин делегация вакиллари бориб, Нукус туманига киритилган инвестиция лойиҳалари ишга туширилишининг тантанали очилиш маросимига қатнашган.
Мақолада қайд этилган кечки дастурхон бевосита Қорақалпоғистон Республикаси вакиллари таклифи ва ташаббуси билан ташкил этилган бўлиб,унда Самарқанд ва Қорақалпоғистон Республикаси жамоатчилиги вакиллари қатнашишган. Кечки тадбирларда Самарқанд вилояти ҳокими Эркинжон Турдимов иштирок этмаган, — дейди масъул.Қорақалпоғистон Вазирлар Кенгаши ахборот хизмати эса мазкур мақолага раддия билдириб, 87 миллион 907 минг сўм пулнинг барчаси овқат учун сарфланмаганини билдирди.
Қарорда кўрсатилган харажатларнинг барчаси овқатланиш учун сарфланмаган ва бунда овқатланишда на Самарқанд вилояти ҳокими Э.Турдимов, на Вазирлар Кенгашининг Раиси Қ.Сариев қатнашган. Яъни, қарорда умумий қилиб келтириб ўтилган, негизида овқатланиши учун 42 миллион 570 минг сўм, саҳна безаклари учун 19 миллион 337 минг сўм, лед экранлари учун 12 миллион, транспорт воситалари учун 14 миллион сўм харажатлари ишлатилган, — дейилади Вазирлар Кенгаши ахборот хизмати хабарида.Вазирлар Кенгаши ахборот хизмати шунингдек, мақолани чиқаришдан аввал чуқур ўрганишни, Самарқанд ва Қароқалпоғистон халқлари ўртасида хафагарчилик хиссини уйғотиши кузатилаётганини таъкидлаган.
«Дарё» таҳририяти шу ўринда масъулларнинг бу эътирозига жавобан шуни маълум қиладики, мақола e-qaror.gov.uz’да келтирилган ахборот бўйича тайёрланган. Шу сабаб e-qaror.gov.uz’га ахборот киритишда диққатлироқ бўлишни, мазкур тармоққа жойлашган ҳар бир фармойиш ва қарор жамоатчликка кўриниб туришини эслатиб ўтади.
Изоҳ (0)