Давлат ташрифи билан Ўзбекистонда бўлиб турган Сингапур президенти Ҳалима Яқуб бугун бош вазир ўринбосари Зулайҳо Маҳкамова ҳамроҳлигида Самарқанд шаҳрига ташриф буюрди. Бу ҳақда Самарқанд шаҳри ҳокимлиги хабар берди.
Қайд этилишича, “Афросиёб” поездида Самарқанд шаҳрига келган олий мартабали меҳмонни Самарқанд вилояти ҳокими Эркинжон Турдимов кутиб олди.
Шавкат Мирзиёевнинг таклифига биноан Сингапур президенти Ҳалима Яқуб 23 май куни давлат ташрифи билан Ўзбекистонга келганди. У мамлакатга келишда Uzbekistan Airways’нинг доимий рейсидан фойдаланган.
Олий мартабали меҳмон ва Сингапур делегацияси аъзолари “Янги Ўзбекистон” боғига ташриф буюриб, Мустақиллик монументи пойига гул қўйди, Ўзбекистоннинг истиқлол йилларидаги ривожланиши ва ушбу бетакрор мажмуанинг яратилиш тарихи билан танишди, миллий маданий марказ вакиллари билан учрашди. 24 май куни Кўксаройда Сингапур президентини расмий кутиб олиш маросими бўлиб ўтди. Шунингдек, у Сингапур президенти Ҳалима Яқуб бошчилигидаги делегация Ўзбекистон президенти ҳузуридаги Давлат бошқаруви академиясига ташриф буюрди.
Изоҳ (0)