Ўзбекистон ҳукумати делегацияси Хитойнинг Ханчжоу шаҳрига ташиф буюргани тўғрисида хабар берилганди. Ҳукумат порталига кўра, “Ханчжоу Хуасзя” давлат қароргоҳида бош вазир Абдулла Арипов Хитой давлат кенгаши бош вазири Ли Сян бошчилигида ҳукумат делегацияси билан учрашув ўтказган.
Дастлаб, Ўзбекистон томони Шавкат Мирзиёевнинг ХХР раиси Си Цзиньпинга йўллаган самимий саломи ва эзгу тилакларини етказган. Хитой Халқ Республикаси ташкил топганининг 74 йиллиги билан қутлаган.
Қайд этилишича, 2022 йилда икки давлат ўртасидаги ўзаро савдо айланмаси қарийб 9 миллиард долларни ташкил этган. Савдо ҳажмини ошириш бўйича икки давлат раҳбарлари томонидан ҳукуматлар зиммасига 10 миллиард долларга етказиш вазифаси юклатилган.
Учрашувда нафақат мазкур натижага эришиш, балки ўзаро савдони 12-13 миллиард долларга етказиш учун барча имкониятлар мавжудлиги қайд этилган. Жумладан, Хитойга тўқимачилик, мис, минерал ўғитлар, қишлоқ хўжалиги ва бошқа турдаги маҳсулотларнинг экспорт ҳажмини ошириш имконияти мавжуд.
Шу билан бирга, “яшил” энергетика, автомобилсозлик, электротехника, рангли ва ноёб металларни қайта ишлаш, “ақлли” қишлоқ хўжалиги, агро ва сувни тежайдиган технологиялар ишлаб чиқариш соҳаларида истиқболли лойиҳаларни амалга ошириш муҳимлиги қайд этилган. Бунинг учун замонавий технологияларга асосланган Ўзбекистон—Хитой индустриал паркини ташкил этиш таклиф этилган.
Шунингдек, Ханчжоуга ташриф доирасида Huawei, Energy China International, Silk Road Found сингари Хитойнинг йирик компаниялари раҳбарияти билан икки томонлама ҳамкорлик алоқаларини кенгайтириш бўйича ҳам учрашувлар ўтказилган. Ўзбекистон ҳукумати делегациясининг Хитойга ишчи ташрифи давом этмоқда.
Эслатиб ўтамиз, октябр бошларида Силк Роад бриэфинг нашри Хитой-Қирғизистон-Ўзбекистон темирйўли қурилиши қолдирилгани ҳақида хабар берганди. Қирғизистон Вазирлар Маҳкамаси раиси ўринбосари Бакит Торобоев эса мазкур маълумотни рад этди.
Изоҳ (0)