Европа комиссияси Хитойнинг Теmu онлайн савдо гигантига нисбатан жарима тартибини очди.
Брюсселда онлайн арзон товарлар сотувчи компания Европа иттифоқининг рақамли хизматлар ҳақидаги қонунини бузганликда гумон қилинмоқда.
“Гап сохта ва хавфли маҳсулотлар савдоси ҳақида кетмоқда”, дейилади хабарда.
Жараён давомида, хусусан, Теmu веб-сайтининг дизайни ўрганилади. Илова танқидчиларининг фикрига кўра, у харидорлар ўртасида қарамликни келтириб чиқарадиган ва уларни режалаштирилмаган харажатларга ундайдиган тарзда яратилган.
Еврокомиссия раиси ўринбосари Маргрет Вестагер Хитой компаниясини сотилаётган маҳсулотлар Европа иттифоқи стандартларига мос келиши ва истеъмолчиларга зарар етказмаслигини таъминлашга чақирган.
Германия Иқтисодий ишлар вазирлиги, шунингдек, истеъмолчилар ҳуқуқларини ҳимоя қилиш уюшмалари ҳам Теmu ва арзон маҳсулотларни сотувчи бошқа онлайн дўконларга, жумладан, Shein’га нисбатан қаттиқроқ чоралар кўриш тарафдори.
Теmu Европа иттифоқи расмийлари билан ҳамкорлик қилишга тайёрлигини маълум қилган.
- Рақамли хизматлар тўғрисидаги қонун Европа иттифоқида 2023 йил август ойида кучга кирган. Ушбу қонун интернет компанияларни ирқчилик, дори воситалари ва қалбаки маҳсулотлар савдоси, болалар порнографияси ва дезинформация тарқалишига қарши курашишни назарда тутади.
Агар қонун бузилиши исботланса, Еврокомиссия йил давомида жаҳон савдо айланмасининг 6 фоизигача жарима солиши мумкин.
Изоҳ (0)