Шавкат Мирзиёевнинг Тожикистон президенти Эмомали Раҳмон билан ўзаро келишувига асосан мамлакат ҳукумати делегацияси 21 июль куни Тожикистонга ташриф буюрди. Бу ҳақда бош вазир матбуот хизмати хабар берди.
Маълум қилинишича, Душанбе шаҳрида Тожикистон президенти Эмомали Раҳмон Ўзбекистон бош вазири Абдулла Арипов бошчилигидаги делегацияни қабул қилган.
Суҳбат аввалида бош вазир Тожикистон президенти Эмомали Раҳмонга давлат раҳбари Шавкат Мирзиёевнинг самимий саломи ва эзгу тилакларини етказган. Ўз навбатида, Тожикистон раҳбари Ўзбекистон етакчисини ва бутун мамлакат халқини президент сайловидаги ишончли ғалабаси билан яна бир бор самимий табриклаб, тинчлик-осойишталик, фаровонлик ва равнақ тилаган.
Ўзбекистон бош вазири сайловдан сўнг Шавкат Мирзиёевни дастлабки дақиқаларда президент Эмомали Раҳмон табриклаганини билдириб, бу қардош Тожикистон давлати мамлакатда олиб борилаётган ислоҳотларни қатъий қўллаб-қувватлаётганидан далолат эканини қайд этган.
Учрашувда олий даражада эришилган келишувлар ижросини таъминлаш, Ўзбекистон билан Тожикистон ўртасидаги кўп қиррали муносабатларни, энг аввало, савдо-иқтисодиёт, инвестициялар, энергетика, қишлоқ хўжалиги ва бошқа устувор соҳаларда амалий ҳамкорликни янада кенгайтиришга алоҳида эътибор қаратиш кераклиги таъкидланган.
Шавкат Мирзиёев 18 май куни Сиан шаҳрида ўтаётган Марказий Осиё мамлакатлари ва Хитой саммити доирасида Тожикистон президенти Эмомали Раҳмон билан учрашув ўтказганди. Шунингдек, ҳар икки давлат раҳбарлари 19 июль куни Марказий Осиё мамлакатлари ва Кўрфаз араб давлатлари ҳамкорлик кенгаши етакчиларининг биринчи саммитида иштирок этган.
Изоҳ (0)