Бир шахс кетма-кет икки муддатдан ортиқ Сенат раиси бўлиши мумкин эмаслиги белгиланди 

Президент имзолаган қонун билан айни бир шахс сурункасига икки муддатдан ортиқ Сенат раиси бўлиши мумкин эмаслиги белгиланди. 

Мазкур қонун билан айрим ҳужжатларга ўзгартириш ва қўшимчалар киритилди. Хусусан, “Ўзбекистон Республикаси Олий Мажлисининг инсон ҳуқуқлари бўйича вакили (омбудсман) тўғрисида”ги қонунга киритилган қўшимчага кўра, вакил конституцияга мувофиқ қонунчилик таклифларини қонунчилик ташаббуси тартибида Олий Мажлиснинг Қонунчилик палатасига киритишга ҳақли экани белгиланди.

“Референдум якунлари ҳамда давлат ҳокимияти ташкил этилишининг асосий принциплари тўғрисида”ги конституциявий қонунга киритилган қўшимчага кўра, Қонунчилик палатасининг депутати бир вақтнинг ўзида Қорақалпоғистон Республикаси Жўқорғи Кенгесининг, вилоятлар, туманлар, шаҳарлар давлат ҳокимияти вакиллик органларининг депутати бўлиши мумкин эмаслиги белгиланди.

“Ўзбекистон Республикаси Олий Мажлисининг Сенати тўғрисида”ги конституциявий қонунга киритилган ўзгартиришга кўра, Сенат аъзолари (сенаторлар) Қорақалпоғистон Жўқорғи Кенгеси, вилоятлар, туманлар ва шаҳарлар давлат ҳокимияти вакиллик органлари депутатларининг тегишли қўшма мажлисларида мазкур депутатлар орасидан яширин овоз бериш йўли билан Қорақалпоғистон, вилоятлар ва Тошкент шаҳридан тенг миқдорда — тўрт кишидан сайланади.

Сенатнинг тўққиз нафар аъзоси фан, санъат, адабиёт, ишлаб чиқариш соҳасида ҳамда давлат ва жамият фаолиятининг бошқа тармоқларида катта амалий тажрибага эга бўлган ҳамда алоҳида хизмат кўрсатган энг обрўли фуқаролар орасидан президент томонидан тайинланади.

Шунингдек, Сенат ва унинг органлари мажлисларида Марказий банк бошқаруви раиси иштирок этиши мумкин. Бундан ташқари, айни бир шахс сурункасига икки муддатдан ортиқ Сенат раиси бўлиши мумкин эмаслиги белгиланди. Сенат конституцияга мувофиқ қонунчилик таклифларини қонунчилик ташаббуси тартибида Қонунчилик палатасига киритишга ҳақли.

Қонунчилик таклифларини тайёрлаш, кўриб чиқиш ва уларни Қонунчилик палатасига киритиш тартиби Сенатнинг регламентида белгиланади. Қонун расмий эълон қилинган кундан эътиборан кучга киради.