Олий Мажлис Қонунчилик палатасининг Коррупцияга қарши курашиш ва суд-ҳуқуқ масалалари қўмитасининг йиғилишида бир гуруҳ депутатлар томонидан ишлаб чиқилган “Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун лойиҳаси дастлабки тарзда кўриб чиқилди. Бу ҳақда парламент қуйи палатаси матбуот хизмати хабар берди.
Қайд этилишича, мазкур қонун лойиҳаси билан 13 та қонун, 1 та кодексга тегишли ўзгартириш ва қўшимчалар киритиш назарда тутилмоқда.
Жумладан, 100 минг нафардан кам бўлмаган фуқаролар, Сенат, Омбудсман ва Марказий сайлов комиссияси қонунчилик таклифларини Қонунчилик палатасига киритишга ҳақли эканлиги мустаҳкамланмоқда. Ушбу қоиданинг киритилиши давлат ишларини бошқаришда фуқароларнинг иштирокини кенгайтиради.
Шунингдек, Қонунчилик палатасидаги фракция раҳбарининг ваколатлари алоҳида моддада аниқ белгиланмоқда. Парламент текширувини Қонунчилик палатаси депутатлари ва Сенат аъзолари орасидан тенглик асосида тузиладиган биргаликдаги махсус комиссияси томонидан ўтказилиши кўзда тутилмоқда.
Бундан ташқари, Қонунчилик палатаси қўмиталарига ҳукумат аъзоларининг ҳисоботлари ва давлат органлари раҳбарларининг ахборотини эшитиш ташаббуси билан чиқиш ҳуқуқи берилмоқда.
Йиғилиш якунида қўмита аъзолари қонун лойиҳаси жамоатчилик муҳокамаси якунлари ҳамда халқаро ҳуқуқнинг умум эътироф этилган принциплари ва нормалари ҳисобга олинган ҳолда маромига етказилиши ҳақида қарор қабул қилган. Қонун лойиҳасини консептуал жиҳатдан парламент мажлисида кўриб чиқиш учун Кенгашга таклиф қилиш масаласи ҳал қилинган.
Аввалроқ Олий Мажлис Қонунчилик палатасининг мажлисида Жиноят, Жиноят-процессуал кодексларига ҳамда Маъмурий жавобгарлик тўғрисидаги кодексига ўзгартириш ва қўшимчалар киритиш ҳақидаги қонун лойиҳаси кўриб чиқилгани тўғрисида хабар берилганди.
Изоҳ (0)