26 апрель куни Олий Мажлис Сенати раиси Танзила Норбоева бошчилигида хотин-қизлар ва болалар ҳуқуқларини ҳимоя қилиш, шунингдек, вояга етмаганларга нисбатан ножўя ҳаракатларни содир этганлик учун жавобгарликни янада кучайтириш масалаларига бағишланган мажлис бўлиб ўтди. Бу ҳақда парламент юқори палатаси матбуот хизмати «Дарё»га маълум қилди.
Йиғилишда Олий Мажлис Сенати аъзолари, Олий Мажлиснинг Инсон ҳуқуқлари бўйича вакили (омбудсман) ўринбосари, шунингдек, вазирлик ва идоралар, нодавлат нотижорат ташкилотлари, оммавий ахборот воситалари вакиллари иштирок этган.
Қайд этилишича, авваллари ушбу тоифадаги инсонларга тазйиқ ва зўравонлик ёпиқ мавзу бўлиб, у очиқ-ошкора муҳокама қилинмаган.
«Афсуски, соҳада амалга оширилаётган ишларга қарамасдан, салбий ҳолатлар ҳанузгача содир этилмоқда. Хотин-қизлар ва вояга этмаганларга нисбатан зўравонлик ва шилқимлик ҳолатлари ҳали ҳам учраб турибди. Бу амалдаги қонунчилик ва ҳуқуқни қўллаш нормаларини пухта кўриб чиқишни, уларни мавжуд воқеликка мослаштиришни талаб қилади», — дейилади хабарда.
Шу муносабат билан Олий Мажлис Сенатида Хотин-қизлар ва болалар ҳуқуқларини ҳимоя қилиш, шунингдек, вояга етмаганларга нисбатан номақбул ҳаракатларни содир этганлик учун жавобгарликни янада кучайтириш масалаларини ўрганиш бўйича Ишчи гуруҳ тузилган. Унга ҳуқуқни қўллаш амалиётини таҳлил қилиш ва амалдаги норматив-ҳуқуқий ҳужжатларни хатловдан ўтказиш, халқаро тажрибани чуқур ўрганиш ҳамда хотин-қизлар ва болалар ҳуқуқларини ҳимоя қилиш соҳасидаги қонунчилик базасини такомиллаштириш бўйича таклифлар ишлаб чиқиш вазифалари юклатилган, улар кейинчалик мамлакат парламенти томонидан кўриб чиқилади.
Бундан ташқари, амалга оширилиши лозим бўлган ишларни ўз ичига олган Чора-тадбирлар режаси тасдиқланган. Эътиборли жиҳати, уни амалга оширишга ихтисослашган фаолият билан шуғулланаётган нодавлат нотижорат ташкилотлари ва мустақил экспертлар жалб этилади.
Шу муносабат билан ННТ, фуқаролик жамияти институтлари вакиллари, олимлар ва мутахассислар Олий Мажлис Сенатида ташкил этилган Ишчи гуруҳ фаолиятида фаол иштирок этишга чақирилади. У билан «Senat14@exat.uz», «Qonunchilik@senat.go.uz» электрон манзиллари орқали боғланиш мумкин.
Мавзуга доир:
- Тошкент метрополитенида 13 ёшли қизга беҳаё ҳаракатлар қилган шахсга жиноят иши қўзғатилди. У бир йилгача озодликдан маҳрум қилиниши мумкин.
- Бухорода 14 ёшли қизни зўрлаб келган чўпон 3 йилга озодликдан маҳрум қилинди
- Сирдарёдаги мактаб ҳожатхонасида 8 ёшли қизга нисбатан ахлоқсиз ҳаракатларни амалга оширган эркак 10 йилга қамалди
Изоҳ (0)