Президент Шавкат Мирзиёев 2024 йилнинг 16 февраль куни Андижон вилоятига ташрифи чоғида Хонобод шаҳрининг “Янги ҳаёт” маҳалласида ҳам бўлди. Давлат раҳбари маҳалладаги хонадонларда бўлиб, аҳолининг яшаш шароитини ўрганганди. Салоҳиддин Усмонов хонадонида меҳмон бўлган президент унинг 8 сотихли томорқасидан унумли фойдаланиб, қўзиқорин етиштиришини олқишлади. Ҳудудларда тажрибани оммалаштириш кераклигини таъкидлади. “Дарё” мухбири президентни меҳмон бўлган қилган хонадон вакиллари билан суҳбатлашди.
Президентимизнинг хонадонимизга ташрифи биз учун жуда ҳам омадли бўлди. Оиламизга бахт чеки тушди деб ғоятда хурсандмиз. У кишининг хонадонимизга кириб, кунлик қилаётган меҳнатимизни эътироф этгани, иссиқхонагача кириб ҳамсуҳбат бўлганидан бошимиз осмонга етди. Ҳали ҳам ҳаяжондамиз. Учрашувдан сўнг юртбошимиз турмуш ўртоғимга “Ука, шунчалик ҳаракат қилибсизлар, нечта хонадонга нафингиз тегяпти экан. Бунинг учун келинга ҳам, сизга ҳам раҳмат”, дегач, тўғриси, кўзимга ёш келди. Анжанча айтганда маза қилдим, — дейди президент меҳмон бўлган хонадон бекаси Зиёда Усмонова.
Зиёда опа таассуротлари билан ўртоқлашар экан, қандай қилиб қўзиқорин бизнесига аралашиб қолгани ҳақида гапириб берди.
Узоқ йиллар Хонобод шаҳридаги тиббиёт бирлашмасида ҳамшира бўлиб ишлаганман. Бироқ 2010 йилдан кейин саломатлигим тўғри келмагач, ишламай қўйдим. Шундан буён уй бекасиман. Турмуш ўртоғим ветеринар бўлгани учун кенг далада чорвачилик билан шуғулланганмиз. Кейинчалик шу маҳаллага кўчиб ўтгач, ҳайвонларни сотиб, шуларнинг эвазига икки қаватли уй қурдик. Фарзандларни ўқитдик. Доим иш билан банд бўлган одам уйда бекор ўтиролмас экан. Ҳовлида турли гул кўчатлари, сабзавотлар етиштирамиз, паррандалар боқамиз. Умуман олганда ернинг ҳар бир қаричидан унумли фойдаланишга ҳаракат қиламиз.
Катта фарзандимни Хитойда ўқитганмиз. Шу ўғлим пандемияда уйга қайтиб келди. Ўзингизга маълум ўшанда ҳамма уйда ўтириб қолди. Шунда ўғлим қўзиқорин фойдали нарса эканлигини, шуни етиштириб кўришни тавсия қилди. Дадасига айтганимизда дастлаб унамасдан “Йиғиштир ишингни, ундан кўра молни, қўйни боқ. Шундан фойда”, деди. Шунақа бўлса-да, қизиқишимиз кучлилик қилиб бир ҳаракат қилиб кўрайлик, деб она-бола яширинча ишни бошлаб юборгандик, — дейди суҳбатдош.
Хонадон бекасининг таъкидлашича, дастлаб қўзиқорин уруғлари оилавий истеъмол учун етиштиришга мўлжалланган. Бироқ қўни-қўшниларнинг харидор бўлгани уларни янада кўпроқ ҳосил етиштиришга ундаган.
Дастлаб Тошкентдан 10 кило уруғ келтириб, кичкинагина хонада етиштиришни бошладик. Биринчи кўчатларимиз шунақа чиройли очилиб, чиройли ҳосил берди кўзимизни қувонтирди. Қўни-қўшни ва қариндош-уруғлар кўриб, қизиқиб нима бу деб ҳам сўрашди. Қўзиқоринлигини айтиб, фойдали жиҳатларини, организмда холестерин моддаси тўпланишининг олдини олишини тушунтиргандик қизиқишди. Ўзимиз ҳам, биздан олиб кетганлар ҳам қўзиқориндан салат, сомса ва бошқа овқатларни қилиб едик. Ҳаммага ёқди. Харидорлар чиқа бошлади. Буни кўриб, соца бўлар экан, яхшигина бизнес деб кейин яна йигирма килограмм олиб келдик. Ўзимизнинг истеъмолимиз учун етиштирган ҳосилимиздан кутилмагандек пул кела бошлади. Буни кўриб турмуш ўртоғимнинг ўзи ҳам қизиқиб қолди. Етиштиришда ўзи ҳам қатнашадиган, суви ва хона ҳароратига қарайдиган бўлди.
Ҳозир у киши асосан ишда бўлгани учун дам олиш кунлари ёки бекор бўлиб қолганида ўзи шелухаларни олиб келиб, уруғларини экиб, қарашиб туради. Қизиқиш билан бошланган ишга Аллоҳ барака бериб, қўзиқорин етиштиришга ўтиб кетдик.
Қўзиқоринларни дастлаб хоналарда етиштирган бўлсак, ҳозир асосан ушбу иссиқхонада парваришланади. Айни пайтда бу ерда уч юзта қопимиз бор. Булардан ҳар уч кунда йигирма килогача ҳосил узиб етиштирамиз. Уларни шаҳардаги ва вилоятдаги кафе, ресторан ва дўконларга берамиз. Бундан бир ойда ўртача 10 миллионгача даромад оляпмиз десам муболаға бўлмайди. Мисол учун, битта қопимиз барча харажати билан 25 минг сўмга тайёр бўлади. Меъёрда етиштирилса, битта қопдаги уруғ уч ой давомида минимум 5 килогача ҳосил бериши мумкин. Яъни 25 минг сўм сарфлаб, энг ками 125 минг фойда олиш мумкин, — дейди хонадон бекаси.
Хонадон эгаларининг айтишича, ҳозирда қўзиқорин етиштириш билан маҳаллада йигирмага яқин, атрофдаги туманларда эса элликка яқин оила шуғулланади. Улар шу бизнесга бош қўшганларга маслаҳатлар бериб келади.
Бекорчиликни хуш кўрмайман. Шу сабабли қўшни аёллар кўчада бекор қолганини кўрсам, уларни нимадир қилишга чақираман. Беш-олти ой аввал маҳалладаги ишсиз, бекор ўтирган аёлларга шу иш билан шуғулланишни таклиф қилдим. Ўйланишди. Шунда “Келинглар бир қилиб кўринглар, иши, меҳнати оғир эмас, яхши эътибор бериб, сув сепиб турсангиз бўлди”, дедим. Дастлаб иккита қўшним бошлади. Ҳозир уларнинг қўзиқоринлари ҳосил беришни бошлаган. Кейинчалик яна ўн иккита хонадон хайрихоҳлик билдирган.
Бундан ташқари, атрофдаги бошқа Андижон, Пахтаобод, Улуғнор ва Қўрғонтепа туманларида яшовчи яна 70 та хонадонга ҳам уруғ тарқатганмиз. Улар билан доим алоқадамиз, тушунмаганларини ўргатиб, маслаҳат бериб турибмиз. Керак бўлса ҳосилини бизга берса, ўзимиз харидорларга етказиб беряпмиз. Келгусида иссиқхонани янада катталаштириб, ишчи ёллаб ишлатиш режамизда бор. Мақсадимиз — нафақат вилоятимиз, балки қўшни давлатларга ҳам экспорт қилиш. Чунки, Қирғизистон ва Тожикистондан талаблар туша бошлаган. Иш кўламини кенгайтиргач, уруғга бўлган талаб ҳам ортади. Шу сабабли хўжайним ўзи қандай қилиб қўзиқорин уруғини олиш, тайёрлаш бўйича ўрганишлар олиб боряпти. Бундан ташқари истеъмол талаби юқори бўлган бошқа янги навларни ҳам етиштиришни йўлга қўйиш истагимиз бор, — дейди суҳбатдош.
Оила бошлиғи Салоҳиддин Усмоновнинг айтишича, давлат раҳбарининг хонадонига ташрифи ва берган маслаҳатлари сабаб барча оила-аъзоларини ҳалигача ҳаяжон тарк этмаган.
Тўғрисини айтиш керак, ташрифдан бери мени ҳаяжон тарк этгани йўқ. Хурсандчилигим чексиз. Юртбошимизнинг энг чекка ҳудудда яшовчи биз каби фуқаролар хонадонига ташриф буюрганидан нафақат мен, балки бутун оиламиз жуда хурсанд. Бизга катта умид, эртанги кунга ишонч берилди. У кишидан ўзимга куч олдим.
Президентимиз хонадонимизга ташриф буюриш чоғида уйимизга нур кириб келгандек бўлди. Суҳбат давомида фаолиятимизни янада ривожлантириш, керак бўлса буни кластер даражасига олиб чиқиш бўйича топшириқ берилди. Шундан келиб чиқиб, яқин орада Хитойга бориб келиб, яна етти-саккизта янги навни етиштиришни йўлга қўйишни режалаштирмоқдамиз. Бундан ташқари, уйда туриб кўпроқ даромад олиш бўйича янги ғоялар устида ишламоқчимиз. Давлатимиз раҳбари бизга шундай бир шижоат бердики, энди тўхтаб қолмасдан фақат олдинга интиламиз, — дейди Салоҳиддин ака.
Изоҳ (0)