Уч гектарга 70 минг доллар: Ўзбекистоннинг уч ҳудудида ернинг ноқонуний сотилиши олди олинди 

ДХХ томонидан Ўзбекистоннинг уч ҳудудида ернинг ноқонуний сотилиши олди олинди. 

Маълум қилинишича, Самарқанд вилоятининг Нуробод туманидаги қишлоқ хўжалиги маҳсулотлари етиштиришга ихтисослашган фермер хўжалиги раҳбари ва ҳисобчиси ўзаро тил бириктириб, мазкур хўжаликка 49 йил муддатга ижарага берилган 3 гектар ер майдонини харидорга 70 минг АҚШ долларига сотишга келишган. Улар олдиндан 35 минг АҚШ доллари олган вақтида Давлат хавфсизлик хизмати, Бош прокуратура ҳузуридаги департамент ҳамда ички ишлар органлари ходимлари томонидан ушланди. 

Бу йўналишда Давлат хавфсизлик хизматининг Қашқадарё вилояти бўйича бошқармаси ходимлари ҳам бошқа ҳуқуқ-тартибот идоралари билан ҳамкорликда тезкор тадбирлар ўтказди. Жумладан, Қашқадарё вилоятининг Қамаши туманидаги чорвачиликка ихтисослашган фермер хўжалиги раҳбари мазкур тумандаги кластерга тегишли 66,32 гектар яйлов ерларидан иккиламчи ижара шартномаси асосида фойдаланиб келаётган бўлса-да, ушбу шартномани бекор қилган ва кластер раҳбарлари орқали 57 гектар яйловни харидор номига ижара асосида расмийлаштириб бериш эвазига 500 миллион сўм талаб қилган. Аммо у сўралган пул маблағи ҳисобидан 20 минг АҚШ доллари ва 100 млн сўм олган вақтида ашёвий далиллар билан ушланди.

Бошқа ҳолатда эса Шаҳрисабз туманидаги агрофирма раҳбари туман ҳокимлиги захирасида бўлган 50 гектар суғориладиган ер майдонини мансабдор танишлари орқали харидорга 1 йил муддатга, тегишли ҳужжатларсиз фойдаланиш учун олиб бериш эвазига 500 миллион сўм талаб қилиб, олдиндан 150 миллион сўм олган вақтида ушланди. 

Шунингдек, терговга қадар текширув давомида, у мазкур пул маблағининг бир қисмини ўзининг жиноий шериги бўлган, пахта-ғалла етиштиришга ихтисослашган фермер хўжалик раҳбарига бериши кераклиги аниқланиб, ушбу шахс ҳам 20 миллион сўм олган вақтида ушланди. Агрофирма раҳбари ҳам, кластер раҳбари ҳам муқаддам судлангани қайд этилган. 

Сурхондарё вилоятининг Қизириқ туманида яшовчи, 1975 йилда туғилган фуқаро ўзининг турмуш ўртоғига туман ҳокимининг 2010 йилдаги қарори асосида деҳқон хўжалиги ташкил этиш учун 49 йил муддатга ижарага берилган 30 сотих ер майдонини гўёки 40 сотих деб айтиб, харидорга 280 миллион сўмга сотишга келишади. Аммо Давлат хавфсизлик хизмати ва Бош прокуратура ҳузуридаги департамент ҳамда ички ишлар органлари ходимлари ҳамкорлигида ўтказилган тезкор тадбирда, у сўралган пул маблағини олган вақтида ашёвий даллиллар билан ушланди. 

Ҳозирда мазкур шахсларнинг барчасига нисбатан жиноят ишлари қўзғатилган.