Бугун, 12 февраль куни президент Шавкат Мирзиёев раислигида қишлоқ хўжалигида 2024 йилда бажариладиган ишлар юзасидан видеоселектор йиғилиши бўлиб ўтди. Президент матбуот хизмати тарқатган хабарларга кўра, бу йил соҳада қатор ўзгаришлар бўлади.
Энди четдан келтирилган чигитни экиш мумкин
Йиғилишда жорий йилдан бошлаб, чет элдан олиб келинган чигитни экишга рухсат берилгани маълум қилинди.
Лекин, шу пайтгача Пахтачилик кенгаши, Карантин агентлиги, вилоят ҳокимлари бир тўхтамга келиб, қаердан, қандай навли уруғ олиб келиб, қаерга экишни ҳал қилмагани кўрсатиб ўтилди, — дейилади президент матбуот хизмати хабарида.
Йиғилишда бир ой ичида хориждан 3 минг тонна уруғлик чигитни олиб келиш топшириғи берилган. Жорий йилда 100 минг гектарда юқори ҳосилдор хорижий пахта навларини экиш муҳимлиги таъкидланган. Шу билан бирга, ўғит таннархини 15 фоизга камайтириб, қишлоқ хўжалигини 900 минг тонна минерал ўғит билан таъминлаш вазифаси қўйилди.
Ғалла учун имтиёзли кредит
Маълумотларга кўра, 2023 йилда Ўзбекистонда ғалла ҳосили илк бор 8 миллион тоннага етди.
Фермерлар манфаатдорлигини янада ошириш учун бу йил ғаллачиликда ҳам янгиликлар қилиниши кутилмоқда. Хусусан, пахтадаги каби ғаллада ҳам имтиёзли кредитни тўғридан тўғри фермерга бериш тизими йўлга қўйилади.
Бундан ташқари, давлат ресурси учун харид қилинган буғдойни даладан ташиб келиш ва сақлаш харажати 2024 йилда ҳам тўлиқ бюджетдан қопланади.
Жорий йилги пахта ва ғалла ҳосили учун давлат бюджетидан 10 триллион сўмдан зиёд имтиёзли кредитлар ажратилади.
Ўғит сақлаш омборлари қурилади
Йиғилишда президент 70 та туманда минерал ўғит сақлаш омборларини ташкил қилиш бўйича топшириқ бергани маълум қилинди. Эндиликда омборлардаги ўғитлар қолдиғини кунлик мониторинги юритилади. Февраль апрель ойларида биржага чиқадиган минерал ўғитнинг кунлик ҳажмини 6 минг тоннадан 9 минг тоннага оширилади.
Жорий йилда жойлардаги омборлардан кластер ва фермерларга минерал ўғитни ташишда транспортни логистика порталида мажбурий рўйхатдан ўтказиш тартиби бекор қилинади. Шунингдек, фермерларга ёқилғини ўз вақтида етказиб беришда назорат кучайтирилади.
Фермер пахтани биржада сотиши мумкин
Йиғилишда соҳада ҳисоб-китоб интизомида камчиликлар борлиги айтилган. Масалан, кластерларнинг фермерлар олдидаги қарздорлиги ҳали тўлиқ тўланмаган.
Янги тизимга кўра, олдинги қарзини 1 апрелгача ёпмаган кластер билан фьючерс шартномаси бекор қилинади ва фермерга пахтани биржада сотишга рухсат берилади. Маълумотни электрон платформага тўлиқ киритган ва фьючерс шартнома имзолаган фермерга кредит кўпи билан уч кун ичида ажратилиши шартлиги таъкидланди, — дея хабар берди президент матбуот хизмати.
Янги дастур ва лойиҳалар
Йиғилишда бу йил 127 минг гектарда тупроқ унумдорлигини ошириш ва 677 минг гектар яйловларни деградациядан чиқариш бўйича янги дастур амалга оширилиши айтилган.
Жорий йилда боғ, токзор, сабзавот, полиз, озуқа экини ва иссиқхонадан иборат 1,8 миллион гектар ерларни ҳам тўлиқ рақамлаштиришга топшириқ берилди. Шунингдек, ушбу ерларда экинлар жойлашуви, вегетация жараёни, ҳосилдорлиги, минерал ўғит сарфи “Агроплатформа”да юритилади.
Йиғилишда мева-сабзавот етиштириш ва экспортини ошириш масалалари муҳокама қилинди.
Шу мақсадда аҳолига яна 60 минг гектар ерларни тарқатишга қарор қилинди. Бунинг натижасида 1,5 миллион тонна қўшимча маҳсулот олиб, экспортни яна 200 миллион долларга ошириш мумкин бўлади, — дея қайд этилади хабарда.
Турли йўналишларга кредитлар берилади
Бу йил аҳолига бўлиб берилган ер майдонлари ҳамда томорқа ерларида маҳсулот етиштириш учун 1 триллион сўм кредит ажратилади. Мазкур кредитлар кооперация асосида маҳсулот етиштириш, техника, айланма маблағ учун 100 миллион сўмгача гаровсиз, 150 миллион сўмгача гаров таъминоти 50 фоизга пасайтирилган ҳолда берилади.
Фермер ва деҳқонларга 10 мингта техника 10 йил муддатга (3 йил имтиёзли давр билан) лизингга берилади. Четдан олиб келиниб, лизингга бериладиган мотокультиватор ва минитракторларга божхона имтиёзи 3 йилга узайтирилади.
Шунингдек, иссиқхоналарда маҳсулот етиштиришни қўллаб-қувватлаш бўйича қўшимча чоралар белгиланди. Бунда иссиқхона хўжаликларини кредитлаш механизмини қайта кўриб чиқилади.
Президент ёнилғисиз иситиладиган, ихчам иссиқхоналарни барпо қилиш тажрибасини қўллаб-қувватлаб, тайёр ҳолда топшириш шарти билан 10 сотихли 200 тагача ихчам иссиқхона қуриш вазифасини қўйди. Ушбу мақсадларга “Оилавий тадбиркорлик” дастури доирасида 100 миллион сўмгача гаровсиз кредит берилади, — дея маълум қилинди хабарда.
Қишлоқ хўжалигига инвестициялар жалб қилиш
Хабар берилишича, йиғилишда масъулларга 2024 йилда мавжуд лойиҳалар ҳисобидан 655 миллион доллар хорижий инвестицияни ўзлаштириш вазифаси қўйилган. Шунингдек, тўғридан тўғри инвестиция иштирокида 500 миллион долларлик янги лойиҳаларни бошлаш муҳимлиги таъкидланган. Бунда, Қишлоқ хўжалигини ривожлантириш халқаро жамғармаси ваколатхонасини Ўзбекистонда очиш зарурлиги қайд этилган.
Йиғилишда гўшт, сут ва тухум ишлаб чиқаришни кенгайтириш мақсадида 315 миллион доллар ресурс йўналтирилиши белгиланди. Бу маблағ чорва комплексини ташкил қилиш, қорамол олиш, омихта ем чиқариш учун миллий валютада 17 фоиздан 3 йил имтиёзли давр билан 10 йилга берилади.
Чорва хўжаликларини айланма маблағ билан таъминлашга ҳам 1 триллион сўм имтиёзли кредит йўналтирилади. Ушбу кредитларнинг 18 фоиздан ошган қисми Тадбиркорлик жамғармаси ҳисобидан барча тадбиркорларга қоплаб берилади.
Изоҳ (0)