Эрон президенти Масъуд Пезешкиён БМТ санкцияларига учраган шахсни ядровий лойиҳа устида иш олиб борувчи агентлик раҳбари этиб тайинлади. Бу ҳақда Al Arabiya нашри хабар берди.
Эрон давлат телевидениеси 10 август куни ушбу янгиликни эълон қилган. Унда айтилишича Эрон ядровий департаментига олим Муҳаммад Исломий раҳбар этиб тайинланган.
Муҳаммад Исломий бундан 16 йил олдин Бирлашган Миллатлар Ташкилоти санкцияларига учраган. Унга Эрон ядровий дастурида қатнашганлик ва ёрдам берганлик учун тақиқлар киритилган.
67 ёшли Муҳаммад Исломий президент томонидан ядровий лойиҳа раҳбарлигига расман тайинланган. У айни пайтда Пезешкиённинг ядровий масалалар бўйича маслаҳатчиси сифатида ҳам фаолият олиб бориши айтилган.
Исломийнинг вазифага тайинланиши Эрон ҳукумати томонидан 2015 йилдаги ядровий келишувларни истисно қилиш билан бир пайтга тўғри келмоқда. Эрон эндиликда икки томонлама келишувга мувофиқ ядровий ҳамкорларни танлаш борасидаги ўзига қўйилган тақиқларга зид ҳаракат қилишни бошлаган.
Олдинроқ Эроннинг янги сайланган президенти Пезешкиён президентлик кампанияси вақтида ядровий келишувни жонлантиришга ҳаракат қилишини айтган эди. Исломийнинг бу дастурга жалб қилиниши Теҳрон ҳукуматининг ядровий пойгага қатъий киришгани ифодаси бўлиши мумкин.
Берилган маълумотларга қараганда, Муҳаммад Исломий 2008 йилда Эроннинг Мудофаа саноати бўйича ўқув ва тадқиқот институти раҳбари бўлган пайтида “ядровий қурол етказиб бериш тизимларини ривожлантириш билан шуғуллангани, бевосита алоқадорлиги ёки қўллаб-қувватлагани” учун БМТ санкциясига учраган. У 2021 йилда марҳум президент Иброҳим Раисий томонидан илк бор Эрон ядро бошқармаси бошлиғи лавозимига тайинланган эди. Бунгача, 2018 йилдан бошлаб, мўтадил собиқ президент Ҳасан Руҳоний даврида Исломий транспорт ва шаҳарсозлик вазири бўлиб ишлаган.
Муҳаммад Исломий Эроннинг ҳарбий саноатида йиллар давомида ишлаган, мудофаа вазирининг тадқиқот ва ҳарбий саноат бўйича ўринбосари лавозимида ишлаган.
У, шунингдек, Мичиган штатидаги Детройт университети ва Огаё штатидаги Толедо университетларида қурилиш муҳандислиги бўйича илмий даражага эришган.
Маълумот ўрнида, Эрон мамлакат жанубидаги Бушир шаҳарчасида 1000 мегаватт қувватга эга ягона ядровий реакторини жойлаштирган. Ушбу реакторни таъминлаш учун эса иккита йирик атом электр станцияси қурилмоқда.
Ўзининг узоқ муддатли энергияни кўпайтириш режасига мувофиқ Теҳрондаги ҳукумат 20 000 мегаватт ядровий электр қувватига эришишни мақсад қилган. Ресурс ва манбалар етарли бўлмагани боис мамлакатда сўнгги ойларда оддий аҳоли пунктлари тармоқдан узилиши ҳолатлари кузатилмоқда.
Изоҳ (0)