Ҳиндистонда кўприк қулаши оқибатида 140 дан зиёд одам ҳалок бўлди (видео)

Ҳиндистоннинг Гужарат штати Морви шаҳрида осма кўприк қулаб тушиши натижасида 141 киши ҳалок бўлди, деб хабар бермоқда Asia Plus.

Воқеа жойида қидирув-қутқарув ишлари олиб борилмоқда. Айни пайтгача 177 киши қутқариб олингани айтилмоқда.

Кўприк қулаган вақтида унинг устида бир неча юз киши бўлган. 140 йиллик қадимий кўприк яқинда реконструкциядан сўнг қайта очилган эди. У маҳаллий аҳоли орасида оммабоп жойлардан бири ҳисобланади.

Ҳиндистон бош вазири Нарендра Моди Морвидаги ҳодиса сабабли чуқур қайғуда эканлигини маълум қилди. «Қутқарув ишлари тўла-тўкис олиб борилмоқда, жабрланганларга зарур ёрдам берилмоқда», — деб ёзди у Twitter’да. Бош вазир кўприк қулаб тушиши юзасидан масъулиятни ҳукумат ўз зиммасига олишини айтди.

Гужарат штати бош вазири воқеа жойига етиб келди. У ҳар бир қурбоннинг оиласига 4 миллион рупия (48 минг доллар), ҳар бир жабрланувчига эса 50 минг рупия (600 доллар)дан тўлашга ваъда берди.

Баъзи манбаларга кўра, ҳодиса чоғида кўприкда 500 дан ортиқ одам, шу жумладан, болалар ҳам бўлган. Кўприк қулаганидан кейин 350 дан зиёд киши сувга тушиб кетган. Ҳалок бўлганларнинг кўпчилигини аёллар, болалар ва қариялар ташкил қилади.