Ўзбекистонда январь—февраль ойларида қанча Gentra ишлаб чиқарилгани маълум бўлди

Ўзбекистон автомобиль ишлаб чиқариш саноатида 2022 йилнинг январь—февраль ойларида жами 39 922 та енгил автомобиль ишлаб чиқарилди. Бу ҳақда Давлат статистика қўмитаси маълум қилди.

Маълум қилинишича, ўтган икки ой ичида энг кўп Lacetti-Gentra автомобили ишлаб чиқарилган — 12 340 дона. Аввалроқ февраль ойининг ўзида 8 124 дона Gentra ишлаб чиқарилгани тўғрисида хабар берилганди.

• Lacetti-Gentra — 12 340 дона
• Cobalt — 10 787 дона
• Damas — 9 283 дона
• Nexia Т-250 — 2 902 дона
• Spark — 890 дона
• махсус енгил автомобиллар — 3 720 дона

Эслатиб ўтамиз, 2021 йил давомида Ўзбекистонда икки дона Lacetti-Gentra автомобили ишлаб чиқарилган. UzAuto Motors 2022 йил 3 мартдан бошлаб оммабоп моделларнинг шартномалари янгиланиши — Chevrolet Lacetti-Gentra, Cobalt, Nexia ва Spark автомобиллари учун шартномалар қайта тикланиши ҳақида «Дарё»га расман маълум қилганди. Янги автомобиллар учун шартнома тузиш бошлангани эълон қилингандан сўнг бир неча соат ичида 13 203 та автомобилга шартнома тузилган. Компания харидорларга қўшимча қулайлик яратиш мақсадида, олдиндан тўлов миқдорини 85 фоиздан 50 фоизга туширган. Ўзбекистонда 1 мартдан бошлаб LADA автомобиллари нархи 3 фоиздан 10 фоизга ошган.

Шунингдек, Chevrolet Traverse ва Tahoe автомобилларини харид қилиш учун аризалар қабул қилиш бошланганидан сўнг, дастлабки 20 дақиқада компанияга 200 дан ортиқ буюртма келиб тушган. Ушбу автомобилларга ариза қабул қилишнинг илк куни натижаларига кўра, 320 дан ортиқ буюртма олинган.